बुधवार, ०७ ऑगस्ट
चार मजली इमारतीचे दोन मजले अवैध असल्याने त्यावर निष्काशनाची कारवाई न करण्यासाठी तब्बल दोन कोटी रुपयांची लाच मागणाऱ्या व त्यापोटी ७५ लाखाचा पहिला हप्ता स्वीकारणाऱ्या बृहन्मुंबई महानगरपालिकेच्या निर्देशित अधिकाऱ्यासह आणखी दोन खासगी व्यक्तींवर गुन्हा दाखल करण्यात आला आहे.
मंदार अशोक तारी, (निर्देशित अधिकारी, के पूर्व विभाग, बृहन्मुंबई महानगरपालिका, अंधेरी पूर्व मुंबई), मोहम्मद शहजादा मोहम्मद यासिन शहा (प्रॉपर्टी इस्टेट एजंट) आणि प्रतीक विजय पिसे (कंत्राटदार) असे गुन्हा दाखल झालेल्या तिघा आरोपींची नावे आहे. मंगळवारी (६ ऑगस्ट) ही कारवाई करण्यात आली असून या तिघांविरुद्ध भ्रष्टाचार प्रतिबंधक अधिनियम कायदा कलम ७ आणि ७ (अ) अन्वये गुन्हा दाखल करण्यात आला आहे. लाच लुचपत विभागाच्या मुंबई युनिटने ही यशस्वी कारवाई केली आहे.
लाच लुचपत प्रतिबंधक विभागाकडे तक्रार करणाऱ्या तक्रारदाराची मुंबईतील जे. बी. नगरमधील शहीद भगतसिंग कॉलनीत प्लॉट क्रमांक १९१, १९२ मध्ये स्वतःच्या मालकीचे चार मजले इमारत आहे. इमारतीवरील दोन मजले अवैध असून त्यावर निष्काशन कारवाई न करण्यासाठी तसेच नियोजित प्लॉट क्रमांक १९३, १९४ खरेदी केल्यानंतर तेथील अनधिकृत बांधकामाबाबत सहकार्य करणे असे सर्व मिळून दोन करोड रुपये लाचेची मागणी करण्यात आली होती.
त्यानंतर तक्रारदाराने मुंबई लाच लुचपत विभागाकडे या ३१ जुलै २०२४ रोजी संदर्भात तक्रार केली. त्यानंतर लाच लुचपत विभागाने मंगळवारी (६ ऑगस्ट) केलेल्या पडताळणीमध्ये आरोपीने दोन करोड रुपये लाचेची मागणी करून पहिला हप्ता ७५ लाख रुपये स्वीकारण्याचे मान्य केले. त्यानंतर लाच लचपत विभागाने आरोपीला पकडण्यासाठी सापळा लावला होता.
कारवाईदरम्यान निर्देशित अधिकारी मंदार अशोक तारी याच्या सांगण्यावरून मोहम्मद शहजादा मोहम्मद यासिन शहा (प्रॉपर्टी इस्टेट एजंट) आणि प्रतीक विजय पिसे (कंत्राटदार) यांना ७५ लाख रुपयांची लाच स्वीकारताना रंगेहाथ पकडण्यात आले. तिघाही आरोपींविरोधात गुन्हा दाखल करण्यात आला असून लाच लुचपत प्रतिबंधक विभागाचे पोलीस निरीक्षक गणेश पिंगूवाले पुढील तपास करत आहे.
