शनिवार, १० ऑगस्ट
मुंबईतील दोघा व्यावसायिकांनी अहमदनगरमधील एका व्यावसायिकाची ७५ लाख ४४ हजार रुपयांची फसवणूक केल्याचा प्रकार समोर आला आहे. कंपनीतून पाठविलेल्या प्लायवूड आणि पार्टिकल बोर्डच्या मालाचे पैसे न देता ही फसवणूक झाल्याचे व्यावसायिकाने आपल्या तक्रारीत म्हटले आहे.
या संदर्भात नगरमधील व्यावसायिक सुरेंद्र मोतीलाल लोढा (रा. माणिकनगर, आनंदऋषी हॉस्पिटल मागे, नगर) यांनी दिलेल्या फिर्यादीवरून नगरच्या कोतवाली पोलीस ठाण्यात दोघांविरोधात गुन्हा दाखल करण्यात आला आहे. हरीकिसन भट्टड आणि ब्रिजेश भट्टड (पूर्ण नाव माहित नाही दोघे रा. १०४, बालाजी भवन, नरिमन पॉईंट, मुंबई) अशी फसवणूक करणाऱ्या आणि गुन्हा दाखल झालेल्या मुंबईतील व्यावसायिकांची नावे आहे.
लोढा यांचे एस. मोतीलाल इंडस्ट्रीज नावाची कंपनी असून यामध्ये प्रायव्हेट आणि पार्टिकल बोर्ड तयार केले जातात. त्यांच्या गंज बाजार येथील कार्यालयातून २ मार्च २०२० रोजी आर. एम. बी. इव्हेंट मॅनेजमेंट, १०४, नरिमन पॉईंट, मुंबई या फर्मचे हरीकिसन भट्टड व ब्रिजेश भट्टड यांनी लोढा यांच्याकडे प्लायवूड, पार्टिकल बोर्ड, एम.डी.एफ. बोर्डची मागणी केली. त्यांच्यात वेळोवेळी व्यवहारदेखील झाले.
या व्यवहारापोटी आरोपींकडे ७५ लाख ४४ हजार रुपयांची थकबाकी राहिली होती. सदर पैसे लोढा यांनी मागितले असता, कंपनी अडचणीत असल्याचे सांगत वारंवार टाळाटाळ करण्यात आली. त्यामुळे आपली फसवणूक झाल्याचे लक्षात आल्यानंतर लोढा यांनी पोलीस अधीक्षक राकेश ओला यांच्याकडे तक्रार अर्ज दिला होता. हा तक्रार अर्ज चौकशीसाठी कोतवाली पोलिसांकडे आल्यानंतर अर्जाची चौकशी करत पोलिसांनी गुरुवारी गुन्हा दाखल केला आहे. पुढील तपास सहाय्यक पोलीस निरीक्षक योगिता कोकाटे करत आहे.
