गुरुवार, १५ ऑगस्ट
गुन्ह्यात जप्त करण्यात आलेली कार न्यायालयातून परत मिळवून देण्यासाठी आणि पुण्यात मदत करण्यासाठी दहा हजार रुपये लाच घेणाऱ्या सहाय्यक सरकारी वकील महिलेला लाच लुचपतच्या पथकाने रंगेहात पकडले आहे.
अंजला नलिनी कमलाकर नवगिरे (वय ५४ वर्ष, पुणे) असे लाच घेणाऱ्या सहाय्यक सरकारी अभियोक्ता महिलेचे नाव असून पुणे लाच लुचपत विभागाने ही कारवाई केली आहे.
पुणे लाच लुचपत विभागाकडे तक्रार करणाऱ्या तक्रारदार महिलेच्या पतीविरुद्ध जून २०२४ मध्ये हडपसर पोलीस ठाण्यात गुन्हा दाखल असून सदर गुन्ह्यात तक्रारदाराच्या नावावर असलेली मारुती स्विफ्ट कार जप्त करण्यात आली होती. जप्त करण्यात आलेली कार परत मिळावी यासाठी तक्रारदार महिलेने प्रथम वर्ग न्यायदंडाधिकारी लष्कर कोर्ट, पुणे यांच्या न्यायालयात वकिलामार्फत अर्ज दाखल केला होता. न्यायालयाने सदर अर्जाबाबत म्हणणे सादर करण्याचे आदेश सरकारी अभियोक्ता यांना दिले होते.
त्यामुळे तक्रारदार महिलेने सरकारी वकील अंजला नवगिरे यांची त्यांच्या कार्यालयात भेट घेतल्या असता नवगिरे यांनी तक्रारदार महिलेला गाडी परत मिळवून देण्यासाठी दाखल केलेल्या अर्जाबाबत म्हणणे सादर करण्याकरिता व गुन्ह्यात मदत करण्याकरिता तक्रारदाराकडे दहा हजार रुपये लाचेची मागणी केली होती. त्यामुळे तक्रारदार महिलेने पुणे लाचलुचपत विभागाच्या अधिकाऱ्यांशी संपर्क करत नवगिरे यांच्या विरोधात तक्रार केली होती.
लाच लुचपत विभागाच्या अधिकाऱ्यांनी तक्रारीची पडताळणी केली असता सहाय्यक सरकारी अभियोक्ता अंजला नवगिरे यांनी लाच मागितल्याचे दिसून आले. त्यामुळे लाच लुचपत विभागाच्या अधिकाऱ्यांनी बुधवारी लावलेल्या सापळ्यात तक्रारदाराकडून दहा हजार रुपयांची लाच स्वीकारताना नवगिरे यांना लष्कर कोर्टातील त्यांच्या कार्यालयात पकडण्यात आले. त्यांच्या विरोधात वानवडी पोलीस ठाण्यात गुन्हा दाखल करण्यात आला आहे पुढील तपास लाच लुचपत प्रतिबंधक विभागाचे पोलीस निरीक्षक रुपेश जाधव करत आहे.
