रविवार, १८ ऑगस्ट
महामहीम राज्यपालांच्यावतीने देण्यात येणारा “विशेष उल्लेखनीय सेवा पोलीस पाटील राज्यपाल पुरस्कार” संगमनेर तालुक्यातील सावरगाव तळ येथील कामगार पोलीस पाटील गोरक्ष नेहे यांना जिल्हाधिकारी सिद्धाराम सालीमठ यांच्या उपस्थितीत राज्याचे महसूल मंत्री तथा पालकमंत्री राधाकृष्ण विखे पाटील यांच्या हस्ते देत गौरविण्यात आले.
अहमदनगरच्या जिल्हा मुख्यालयात पार पडलेल्या स्वातंत्र्य दिनाच्या मुख्य शासकीय कार्यक्रमात या पुरस्काराचे वितरण करण्यात आले. यावेळी जिल्हा परिषदेचे मुख्य कार्यकारी अधिकारी आशिष येरेकर, जिल्हा पोलीस अधीक्षक राकेश ओला, महानगर पालिका आयुक्त यशवंत डांगे, अप्पर जिल्हाधिकारी सुहास मापारी, निवासी उपजिल्हाधिकारी राजेंद्र पाटील, गृह उपअधीक्षक हरीश खेडेकर, जिल्हा कृषी अधीक्षक सुधाकर बोराळे, सामान्य प्रशासन विभागाचे तहसीलदार शरद घोरपडे आदी यावेळी उपस्थित होते.
सन्मान चिन्ह व सन्मानपत्र असे या गौरव पुरस्काराचे स्वरूप आहे. सावरगावतळ येथील पोलीस पाटील गोरक्ष रामनाथ नेहे यांनी त्यांच्या आजपर्यंतच्या सेवाकाळात गावामध्ये लोक कल्याणकारी राज्य व सामाजिक न्यायाची अत्यंत प्रभावी अंमलबजावणी केली आहे. शासनाच्या अनेक योजना गावपातळीवर लोकांपर्यंत अत्यंत प्रभावीपणे पोहचवून त्यांची अंमलबजावणी केली आहे. ई पीक पाहणी प्रकल्प गावात यशस्वी केले. महसूल व कृषी विभागाच्या अनेक जन कल्याणकारी योजनांची गावात यशस्वी अंमलबजावणी केली.
पाणी फौंडेशन लोकचळवळीच्या माध्यमातून गावात जलसंधारणचे मोठे काम उभे केले. महिला सक्षमीकरण, पर्यावरण संवर्धन, वृक्षारोपण, ग्रामविकास याचबरोबर गावात कायदा, सुव्यवस्था व शांतता अबाधित राखण्यासाठी कार्य केले. कोविड साथीच्या महामारीच्या काळात गाव सुरक्षित ठेवण्यासाठी अत्यंत मोलाचे कार्य केले.
पोलीस पाटील म्हणून करत असलेल्या कर्तव्याबरोबरच सामाजिक क्षेत्रातही ते अत्यंत प्रभावी कार्य करत आहेत. पुरस्काराबद्दल त्यांचे सर्वत्र अभिनंदन होत आहे.
