मंगळवार, २० ऑगस्ट
थायलंडच्या बँकॉकमध्ये झालेल्या नृत्य स्पर्धेत संगमनेर तालुक्यातील चंदनापुरी येथील चंदनेश्वर विद्यालयाने मोठे यश मिळविले. आठवी ते दहावी गटात प्रथम क्रमांक व पाचवी ते सातवी गटात द्वितीय क्रमांक मिळवत या विद्यालयातील विद्यार्थ्यांनी देशाचे नाव साता समुद्रापार नेले.
बँकॉकमध्ये पार पडलेल्या या स्पर्धेत ५२ संघ सहभागी झाले होते. ग्रामीण भागातून संगमनेरच्या जनता शिक्षण प्रसारक मंडळ संचलित चंदनेश्वर माध्यमिक उच्च माध्यमिक विद्यालयातील विद्यार्थ्यांनी या स्पर्धेत सहभाग घेतला होता.
विद्यालयाचे मुख्याध्यापक खेमनर यांच्या मार्गदर्शनाखाली संगमनेर तालुक्यात सामाजिक कामात अग्रेसर असलेल्या राजनदादा शिंदे युवा मंचचे प्रमुख राजनदादा शिंदे यांनी सर्व विद्यार्थी व मार्गदर्शक शिक्षकांना सुरक्षित नेण्या-आणण्याची जबाबदारी आर्थिकदृष्ट्या स्वीकारून या विद्यार्थ्यांना स्पर्धेसाठी प्रोत्साहन दिले. नृत्य शिक्षक विश्वजीत देशमुख व उपप्राचार्य के. जी. राहणे यांनी विद्यार्थ्यांना मार्गदर्शन केले.
स्पर्धेत यशस्वी ठरलेल्या विद्यार्थ्यांचे राज्याचे माजी मंत्री आमदार बाळासाहेब थोरात, काँग्रेस अध्यक्ष जयश्री थोरात यांच्यासह सामाजिक कार्यकर्ते राजनदादा शिंदे, जनता शिक्षण प्रसारक मंडळाचे अध्यक्ष आनंदराव कढणे, उपाध्यक्ष रामदास राहणे, खजिनदार विठ्ठलराव कढणे, सेक्रेटरी अनिल कढणे, सह सेक्रेटरी अशोकराव रहाणे, नरेंद्र राहणे, रजिस्ट्रार एम. एम. फटांगरे, जल जीवन प्राधिकरणाचे मुख्य अभियंता राजेंद्र राहणे आदींनी कौतुक केले आहे.
