बुधवार, २१ ऑगस्ट
संगमनेर – पथविक्रेता संरक्षण कायद्यानुसार संगमनेर नगरपालिका हद्दीतील नोंदणीकृत पथ विक्रेता समितीची निवडणूक मंगळवारी बिनविरोध पार पडली आहे. आठ जागांसाठी झालेल्या या निवडणुकीत सात सदस्यांची निवड बिनविरोध झाली असून एक जागा रिक्त राहिली आहे.
निवड झालेल्या सदस्यांमध्ये दीपक भानुदास साळुंखे (इतर मागासवर्ग), संतोष गंगाधर मुर्तडक, (सर्वसाधारण), महेंद्र मांगीलाल शर्मा (सर्वसाधारण), दीपा सोमनाथ सोनुले (सर्वसाधारण महिला राखीव), सुगंधा किसन धाकतोडे (अनुसूचित जाती महिला राखीव), संजय वसंतराव बागले (विकलांग) व नर्गिस शब्बीर आत्तार (अल्पसंख्यांक) यांचा समावेश आहे.
केंद्र सरकारच्या पथ विक्रेता (उपजीविका संरक्षण आणि पथविक्री विनियमन) अधिनियम २०१४ नुसार श्रीरामपूर नगर परिषदेचे मुख्याधिकारी तथा निवडणूक निर्णय अधिकारी सोमनाथ जाधव यांच्या अध्यक्षतेखाली ही निवडणूक कार्यक्रम जाहीर करण्यात आला होता.
पथ विक्रेत्यांसाठी शासनाने संरक्षण व पथ विक्री विनियमाचा कायदा केला आहे. त्यानुसार पथ विक्रेत्यांची आठ सदस्यीय पथ विक्रेता समिती निवडण्यासाठी ऑगस्टअखेर निवडणूक घेण्याच्या सूचना होत्या. ८८१ नोंदणीकृत पथ विक्रेता सदस्यांची मतदार यादी जाहीर करण्यात आली होती.
मुख्याधिकारी यांच्या अध्यक्षतेखाली २० सदस्यांची ही समिती असते. त्यात शासकीय ५, अशासकीय ७ आणि पथ विक्रेत्यांतून ८ सदस्यांचा समावेश आहे. आता समितीत ८ पथ विक्रेत्यांच्या निवडीसाठी ही निवडणूक २३ ऑगस्ट रोजी जाहीर करण्यात आली होती. मात्र आठ जागांसाठी सात इच्छुक उमेदवारांचे अर्ज आल्याने त्यांच्या निवडी बिनविरोध पार पडल्या.
अशासकीय सदस्यांमध्ये संघटना व समुदाय प्रतिनिधी, निवासी कल्याण संघ, व्यापारी संघ आणि पणन संघाचा प्रतिनिधी असतील. तर शासकीयमध्ये नगरपरिषद २, पोलिस, आरटीओ आणि वैद्यकीय अधीक्षक अशा प्रत्येकी एकेक सदस्याचा समावेश राहणार आहे.
