शनिवार, २४ ऑगस्ट
बदलापूरसह राज्यात आणि देशात घडत असलेल्या अल्पवयीन मुली आणि महिलांवरील अत्याचाराविरोधात ‘लाडक्या लेकीच्या सन्मान आणि संरक्षणासाठी’ संगमनेरमध्ये काँग्रेस नेते आमदार बाळासाहेब थोरातांच्या उपस्थितीत महाविकास आघाडीचे पदाधिकारी कार्यकर्ते हातात काळे झेंडे घेत, तोंडाला काळी पट्टी बांधून बस स्थानकासमोर ११ वाजता करणार आंदोलन करणार आहे.
महिला अत्याचाराविरोधात समाजातील जनभावना लक्षात घेत महाविकास आघाडीने शनिवारी महाराष्ट्र बंदचे आयोजन केले होते. मात्र या विरोधात ॲड. गुणरत्न सदावर्ते यांच्यासह इतर काही जणांनी मुंबई उच्च न्यायालयात धाव घेत बंदला विरोध दर्शविला होता. न्यायालयाने देखील बंद बेकायदेशीर ठरवत बंद करणाऱ्यांवर कारवाईचे आदेश दिले होते.
भारतीय न्यायव्यवस्था संविधानिक संस्था असल्याने संविधानाचा आदर राखून शनिवारचा बंद मागे घेण्याचे आवाहन राष्ट्रवादी काँग्रेसचे अध्यक्ष शरद पवार यांनी केले होते. तर शिवसेनाप्रमुख उद्धव ठाकरे यांनी देखील सर्वांनी आपापल्या गावात आपल्या शहरातील चौकात हातात काळे झेंडे घेऊन, तोंडाला काळी पट्टी बांधून ह्या नराधमांचा, सरकारच्या असंवेदनशीलतेचा निषेध करायला बसण्याचे आवाहन केले आहे.
या पार्श्वभूमीवर महाविकास आघाडीतील प्रमुख नेते, काँग्रेस विधिमंडळ पक्षाचे नेते, काँग्रेस राष्ट्रीय कमिटी सदस्य असलेले आमदार बाळासाहेब थोरात आज संगमनेरमध्ये असल्याने सकाळी ११ वाजता लाडक्या लेकीच्या सन्मान आणि संरक्षणासाठी आंदोलन करत आहे. थोरात यांच्या उपस्थितीत महाविकास आघाडीतील पदाधिकारी कार्यकर्ते, संगमनेरकर नागरिक तोंडाला काळ्या फिती लावून आणि हातात काळे झेंडे घेऊन सरकारला जागे करण्यासाठी आंदोलन करणार आहे.
