वसंतराव नाईक विमुक्त जाती व भटक्या जमाती विकास महामंडळाचा व्यवस्थापक सांगळे लाचेच्या सापळ्यात

मंगळवार, २७ ऑगस्ट

इलेक्ट्रॉनिक व्यवसायासाठी वसंतराव नाईक विमुक्त जाती व भटक्या जमाती विकास महामंडळातर्फे राबविण्यात येणाऱ्या वैयक्तिक कर्ज व्याज परतावा योजनेचे ऑनलाइन प्रकरण प्रादेशिक कार्यालयाला पाठविण्यासाठी साडेपाच हजार रुपयांची लाच घेणाऱ्या अहमदनगर कार्यालयाचा अतिरिक्त पदभार असलेल्या छत्रपती संभाजी नगरच्या वसंतराव नाईक विमुक्त जाती व भटक्या जमाती विकास महामंडळाचा प्रादेशिक व्यवस्थापक दत्तू आश्रुबा सांगळे याला सोमवारी लाच लुचपत विभागाच्या अधिकाऱ्यांनी रंगेहात पकडले आहे.

तक्रारदाराचा इलेक्ट्रॉनिकचा व्यवसाय असून त्यांना सदर व्यवसायासाठी कर्जाची आवश्यकता असल्याने त्यांनी वसंतराव नाईक विमुक्त जाती व भटक्या जमाती विकास महामंडळातर्फे राबविण्यात येणाऱ्या वैयक्तिक कर्ज व्याज परतावा योजनेचा ऑनलाईन फॉर्म भरला होता. सदर कर्ज व्याज परतावा योजनेचे ऑनलाइन प्रकरण प्रादेशिक कार्यालय येथे पाठविणे करिता दत्तू सांगळे याने तक्रारदाराकडे शनिवारी साडेपाच हजार रुपये लाचेची मागणी केली होती.

त्यामुळे तक्रारदाराने या विरोधात अहमदनगर लाचलुचपत विभागाकडे तक्रार नोंदवली होती. अहमदनगर लाच लुचपत विभागाने तक्रारीचे पडताळणी केली असता आरोपी दत्तू सांगळे (रा. मोरेश्वर अपार्टमेंट, वाणीनगर, पाईपलाईन रोड, सावेडी, अहमदनगर) याने लाचेची मागणी केल्याचे स्पष्ट झाले.

त्यामुळे सोमवारी (२६ ऑगस्ट) लाच लुचपतचे पोलीस उपाधीक्षक प्रवीणचंद्र लोखंडे यांच्या मार्गदर्शनाखाली पोलीस निरीक्षक राजू आल्हाट यांच्या नेतृत्वाखाली पोलिस अंमलदार किशोर लाड, बाबासाहेब कराड, रवींद्र निमसे, सचिन सुद्रिक, दशरथ लाड यांनी लावलेल्या सापळ्यात दत्तू सांगळे याला तक्रारदाराकडून साडेपाच हजार रुपयांची लाच घेताना रंगेहात पकडण्यात आले. सांगळे याच्या विरोधात अहमदनगरच्या तोफखाना पोलीस ठाण्यात गुन्हा दाखल करण्याचे काम सुरू होते.