मंगळवार, २७ ऑगस्ट
नाशिक – मालेगाव महापालिका हद्दीत केलेल्या विविध विकास कामांची पडताळणी आणि मूल्यमापन न करता २० लाख ६७ हजार ६०७ रुपयांची शासनाची आर्थिक फसवणूक करत स्वतःचा आर्थिक फायदा करून घेतल्याचा चौकशीअंती ठपका ठेवत नाशिकच्या लाच लुचपत प्रतिबंधक विभागाने महानगरपालिकेच्या १५ अधिकाऱ्यांवर गुन्हा दाखल केला आहे.
लाच लुचपत प्रतिबंधक विभागाचे पोलीस निरीक्षक नितीन पाटील यांच्या तक्रारीवरून २० लाख ६८ हजार ६०७ रुपयांचा अपहार केल्याप्रकरणी भ्रष्टाचार प्रतिबंधक कायद्यान्वये छावणी पोलीस ठाण्यात शहर अभियंता कैलास राजाराम बच्छाव, सेवानिवृत्त तत्कालीन कनिष्ठ अभियंता मुरलीधर हरी देवरे, तत्कालीन कनिष्ठ अभियंता संजय जनार्दन जाधव, सेवानिवृत्त तत्कालीन उपअभियंता राजेंद्र काशिनाथ बाविस्कर, खाजगी व्यक्ती सोहेल अब्दुल रहमान मासूमअली शहा, केबीएच पॉलिटेक्निकचे विभाग प्रमुख दिनेश आनंदराव जगताप, तत्कालीन कनिष्ठ लिपिक निलेश हिरामण जाधव, सेवानिवृत्त तत्कालीन लेखापरीक्षक अशोक ओंकार म्हसदे, तत्कालीन कनिष्ठ लिपिक सुहास वसंत कुलकर्णी, तत्कालीन लेखा अधिकारी कमरुद्दीन शमशुद्दीन शेख, तत्कालीन कनिष्ठ लिपिक सुनील दत्तात्रय खडके, सेवानिवृत्त कनिष्ठ लिपिक मधुकर अशोक चौधरी, सेवानिवृत्त मुख्या लेखा परीक्षक उत्तम माधवराव कावडे, कनिष्ठ लिपिक केदा रामदास भामरे आणि तत्कालीन उपायुक्त कृष्णा वळवी (मयत) आदीं विरोधात गुन्हा दाखल करण्यात आला आहे.
मालेगाव मधील विकास कामांची पाहणी न करता ठेकेदार सोहेल अब्दुल रहमान मासूमअली शहा यांना शासन निधीतून देयकाची रक्कम मादा करून महापालिकेची फसवणूक केल्याचा धक्कादायक प्रकार समोर आला आहे. तत्कालीन अधिकारी आणि कर्मचाऱ्यांनी संगनमताने ही फसवणूक केल्याचे चौकशीत निष्पन्न झाल्याचे फिर्यादीत म्हटले आहे.
संबंधितांनी शासन निधीचा सुविनियोग होण्यासाठी प्रत्यक्ष विकास कामावर झालेला खर्च आणि कामांची पाहणी करत तपासणी करणे आवश्यक होते. मात्र त्यांनी ती जबाबदारी टाळत देयकाची रक्कम ठेकेदाराला अदा केली. शासनाच्या तसेच महापालिकेच्या निधीचे आर्थिक नुकसान करत हा अपहार करण्यात आल्याचे फिर्यादीत म्हटले आहे. लाच लुचपत विभागाचे पोलीस निरीक्षक राजेंद्र सानप याप्रकरणी पुढील तपास करत आहे.
