बुधवार, २८ ऑगस्ट
अवैध धंद्यासाठी बहुचर्चित असलेल्या शक्तिमान टॉवरचा अखेर संगमनेर शहर पोलिसांना पत्ता सापडला असून पोलिसांच्या डिटेक्शन ब्रांचच्या (डीबी) कर्मचाऱ्यांनी येथील एका गाळ्यात सुरू असलेल्या मटका अड्ड्यावर सोमवारी साडेसहा वाजता छापा टाकला. कल्याण मटक्याचे आकडे घेणाऱ्या एकाला पोलीस पथकाने पकडत त्याच्यावर कारवाई केली, मात्र याचवेळी येथे सुरू असलेल्या अन्य अवैध धंद्यांकडे पोलीस पथकाने दुर्लक्ष केल्याचे दिसून आले.
राज्यात सुसंस्कृत म्हणून पुढे येत असलेल्या संगमनेरला गेल्या काही दिवसांपासून अवैध धंद्यांचा कलंक लागला असून गल्लोगल्ली हे धंदे राजरोसपणे रस्त्यांवर सुरू आहे. पोलिसांसह अन्य संबंधित सर्वच विभागांचे याकडे अर्थपूर्ण दुर्लक्ष होत असल्याचा आरोप सातत्याने केला जातो. अवैध धंदे करणाऱ्यांमध्ये राजकीय पक्षाचे पदाधिकारी देखील सामील असल्याने पोलीस कारवाई होत नसल्याने अवैध धंदे करणाऱ्यांचे धाडस वाढले आहे.
‘महाराष्ट्र संवाद न्यूज’ वेब पोर्टलने गेल्या काही दिवसांपासून यावर प्रकाश टाकला आहे. शहर पोलीस ठाण्याचे नवे पोलीस निरीक्षक बापूसाहेब महाजन यांना देखील हे धंदे थांबविण्यात अपयश आल्याचे ‘महाराष्ट्र संवाद न्यूजने’ दोन दिवसांपूर्वीच्या वृत्तात म्हटले होते. प्रसिद्ध झालेल्या या वृत्ताची दखल घेत पोलीस निरीक्षक महाजन यांनी आपल्या पथकाला कारवाईचे आदेश दिले.
शहर पोलीस ठाण्याच्या डिटेक्शन टीम मध्ये काम करणाऱ्या पोलीस कॉन्स्टेबल अजित कुऱ्हे, सहाय्यक फौजदार रावसाहेब लोखंडे, पोलीस कॉन्स्टेबल विशाल कर्पे व रोहिदास शिरसाठ यांच्या पथकाने शक्तिमान टॉवर्स बिल्डिंग मधील एका गाळ्यात छापा टाकला असता तेथे केशव गजानन हूजबंद नावाची व्यक्ती आकडेमोड करताना, लोकांकडून पैसे घेताना कल्याण मटका नावाचा जुगार चालविताना आढळून आली.
पोलिसांनी त्याच्या ताब्यातून मटक्यासाठीचे साहित्य व साडेआठशे रुपयांची रोकड ताब्यात घेतली. कारवाई करण्यात आलेल्या पंटरने पोलिसांना मटका अड्डा चालविणाऱ्या मालकाचे नाव न सांगता आपण स्वतःच्या फायद्यासाठी मटका खेळत व खेळवीत असल्याचे सांगितले असले तरी या मटका व्यवसायाचे खरे सूत्रधार सर्वांनाच माहिती आहे. पोलीस तपासात आता त्यांच्यावर काय कारवाई केली जाते हे समोर येईल.
दरम्यान या संदर्भात पोलीस कॉन्स्टेबल अजित कुर्हे यांच्या फिर्यादीवरून आरोपी केशव हूजबंद याच्या विरोधात गु.र.न. ७२३ महाराष्ट्र जुगार प्रतिबंधक कायदा १२ (अ) नुसार गुन्हा दाखल करण्यात आला आहे.
दरम्यान पोलिसांनी शक्तिमान टॉवरमध्ये मटका चालकावर कारवाई केली असली तरी या टॉवरमध्ये सुरू असलेल्या अन्य अवैध धंद्यांकडे मात्र अद्यापही लक्ष दिले नसल्याचे दिसते. राजकीय पक्षाच्या आडून अवैध धंदे करणाऱ्यांवर पोलीस कारवाई करणार का याकडे लक्ष लागले आहे.
