रविवार, दि. ०१ सप्टेंबर
संगमनेर – कायद्याची पायमल्ली करत, राजरोसपणे सुरू असलेल्या कत्तलखान्यावर संगमनेरच्या पोलीस उपअधीक्षकांच्या पथकाने छापा टाकत शनिवारी रात्री कारवाई केली. या कारवाईत पोलिसांनी सहा लाख रुपये किमतीचे तीन टन गोमांस आणि तीन लाखाची पिकअप जीप जप्त केली आहे. गेल्या काही दिवसातील पोलिसांची ही मोठी कारवाई मानली जाते.
याप्रकरणी संगमनेर शहर पोलीस ठाण्यात पोलीस कॉन्स्टेबल राहुल सारबंदे यांनी दिलेल्या फिर्यादीवरून दोघाजणांविरोधात गुन्हा दाखल करण्यात आला असून एक जण फरार झाला आहे. सादिक मुनीर शहा (वय २५ वर्ष, रा. जमजम कॉलनी, संगमनेर) असे पोलिसांनी कारवाईदरम्यान पकडलेल्या आरोपीचे नाव असून कारवाई केलेल्या कत्तलखान्याचा चालक असलेला कमरअली गुलाम जिलानी सौदागर (रा. भारतनगर, संगमनेर) हा फरार झाला आहे.
अधिक माहिती अशी, शहरातील जमजम कॉलनी गल्ली क्रमांक ५ मध्ये असलेल्या कत्तलखान्यात गोवंश जनावरांची कत्तल सुरू असल्याची माहिती पोलीस उपअधीक्षक सोमनाथ वाघचौरे यांना मिळाली होती. त्यांनी लगेचच पोलीस उपनिरीक्षक कल्पेश दाभाडे, पोलीस कॉन्स्टेबल राहुल सारबंदे, पोलीस नाईक राहुल डोके यांना कत्तलखान्यावर कारवाई करण्यास सांगितले.
दाभाडे, सारबंदे यांच्यासह सहाय्यक पोलीस उपनिरीक्षक रावसाहेब लोखंडे, पोलीस कॉन्स्टेबल विशाल कर्पे यांच्या पथकाने मिळालेल्या माहितीच्या आधारे रात्री नऊ वाजण्याच्या सुमारास कमरआली गुलाम सौदागर (कुरेशी) याच्या पत्र्याच्या शेडमध्ये जाऊन खात्री केले असता वाड्याच्या बाहेरच (MH 03 EG 5163) या टाटा इंट्रा पिकअप गाडीमध्ये सुमारे १००० किलो गोमांस भरले असल्याचे आढळून आले. तसेच वाढत पाहणी केली असता तेथे २००० किलो वजनाचे गोवंश जातीचे मांस मिळून आले. पोलिसांनी तेथे पकडलेल्या सादिक मुनीर शहा याने सदरचा माल हा कमरअली गुलाम जिलानी सौदागर याचा असल्याची माहिती पोलिसांना दिली.
कारवाईत पोलिसांनी सहा लाख रुपये किमतीचे तीन टन गोमांस आणि तीन लाख रुपये किमतीची पिकप जीप असा एकूण नऊ लाख रुपये किमतीचा मुद्देमाल जप्त केला आहे. दोन्ही आरोपीविरोधात शहर पोलीस ठाण्यात गुन्हा दाखल करण्यात आला असून पोलीस पुढील तपास करत आहे.
