मंगळवार, दि. ०३ सप्टेंबर
विशेष प्रतिनिधी / मुंबई
ऐन गणेशोत्सवाच्या तोंडावर राज्य परीवहन महामंडळ म्हणजेच एसटी कर्मचारी संघटनांनी संप पुकारला आहे. एसटी कामगार संयुक्त कृती समितीच्यावतीने आजपासून बेमुदत धरणे आंदोलनाला बसले आहेत. आज एसटी कर्मचाऱ्यांच्या आंदोलनाचा पहिलाच दिवस असून याचा एसटीच्या महसूलावर मोठा परिणाम झाला आहे. संपामुळे अंदाजे १४ ते १५ कोटी रुपयांचा महसूल बुडाल्याची माहिती समोर आली आहे.
राज्य सरकारी कर्मचाऱ्यांप्रमाणेच एसटी कर्मचाऱ्यांना वेतन मिळावे, प्रलंबित महागाई भत्ता आणि फरक, वाढीव घरभाडे भत्ता आणि फरक, वेतनवाढीच्या दराचा फरक तसेच ४८४९ कोटी रुपयांमधील शिल्लक रकमेचे वाटप आणि नुकत्याच मुळ वेतनात जाहीर केलेल्या पाच हजार, चार हजार आणि अडीच हजार रुपयांऐवजी सरसकट पाच हजार रुपये मिळावेत अशा मागण्या एसटी कर्मचाऱ्यांकडून करण्यात आल्या आहेत. त्यामुळे या मागण्या मान्य होईपर्यंत आंदोलन सुरू ठेवणार असल्याचा पवित्रा एसटी कर्मचाऱ्यांनी घेतला आहे.
पण यामुळे संपाच्या पहिल्या दिवशी १४ ते १५ कोटी रुपयांचा महसूल बुडाला असून आज २२ हजार ३८९ नियोजित फेऱ्यांपैकी आंदोलनामुळे ११ हजार ९४३ फेऱ्या रद्द झाल्या आहेत. दिवसभर सुमारे ५० टक्के वाहतूक बंद होती.
मुंबई, ठाणे, पालघर विभागातून होणारी आजची कोकणातील जादा वाहतूक सुरळीत चालू आहे. परंतु, उद्या बुधवारी (ता. ०४ सप्टेंबर) जादा वाहतुकीवर परिणाम होण्याची शक्यता व्यक्त करण्यात आली आहे.
तर, आज दिवसभर मुंबई-पुणे महामार्गावरील ई-शिवनेरी बससेवा देखील व्यवस्थित सुरू आहे. पण उद्या बुधवारी मात्र उर्वरीत एसटी कर्मचारी संघटना या संपात सहभागी होण्याची शक्यता व्यक्त करण्यात येत असून यामुळे एसटी सेवा पुर्णतः कोलमडण्याची माहिती आता समोर आली आहे.
संपाच्या पार्श्वभूमीवर वाहतूक ठप्प होऊ नये यासाठी उद्यापासून दीर्घ काळासाठी करार पध्दतीने चालक व इतर आवश्यक कर्मचारी नेमण्यासाठी एसटी प्रशासनाने चाचपणी सुरू करण्यात आल्याची महत्त्वाची माहिती समोर आली आहे.
महत्त्वाची बाब म्हणजे औद्योगिक न्यायालयाने आजचा हा अघोषित संप बेकायदेशीर असल्याचे म्हटले असून या संपात सहभागी झालेल्या संघटना व कर्मचाऱ्यांनी तातडीने कामावर रुजू होण्याचे आदेश न्यायालयाकडून देण्यात आले आहेत. तसेच, कामावर रुजू होणाऱ्या कर्मचाऱ्यांना अटकाव करणाऱ्या संपकऱ्यावर एफआयआर दाखल करण्याचे आदेश स्थानिक एसटी प्रशासनाला औद्योगिक न्यायालयाकडून दिले गेले आहेत. तसेच या घटनेचे पुराव्यासाठी चित्रिकरण करण्याच्या सूचना देण्यात आल्या आहेत.
