लाचेचा पहिला हप्ता घेताना नगर जिल्ह्यात भूमी अभिलेखच्या निमतानदारास रंगेहाथ पकडले
गुरुवार, ०३ ऑक्टोंबर
अहमदनगर – क्षेत्राच्या झालेल्या मोजणीबाबत व मोजणीचा रिपोर्ट, नकाशा न्यायालयात सादर करण्यासाठी तक्रारदाराकडे लाच मागणारा पाथर्डीच्या उपअधीक्षक भूमि अभिलेख कार्यालयातील लाचखोर निमतानदारास लाचेचा पहिला हप्ता घेताना रंगेहात पकडण्यात आले आहे.
अहमदनगर लाच लुचपत प्रतिबंधक विभागाने ही कारवाई केली असून संजय भीमराव मनवरे (वय ५६ वर्ष,रा. भगवाननगर, पाथर्डी, ता. पाथर्डी जि. अहमदनगर) असे लाचखोर अधिकाऱ्याचे नाव आहे. त्याच्याविरोधात पाथर्डी पोलीस ठाण्यात भ्रष्टाचार प्रतिबंधक अधिनियमान्वये गुन्हा दाखल करण्यात आला आहे.
तक्रारदाराच्या नावे असलेल्या मौजे कासार पिंपळगाव ता. पाथर्डी, जि. अहमदनगर येथील क्षेत्राच्या झालेल्या मोजणीबाबत व मोजणीचा रिपोर्ट व नकाशा न्यायालयात सादर करणेकरीता आरोपी लोकसेवक मनवरे यांनी तक्रारदाराकडे लाचेची मागणी केली होती.
त्यानंतर तक्रारदाराने या संदर्भात अहमदनगरच्या लाच लुचपत विभागाशी संपर्क करत तक्रार नोंदवली. लाच लुचपत विभागाने तक्रारीच्या अनुषंगाने दि. १८ सप्टेंबरला लाच मागणी पडताळणी करण्यात आली. लाच मागणी पडताळणी दरम्यान मनवरे यांनी पंचासमक्ष २५-३० हजार रुपये लाचेची मागणी करून सदर लाच रकमेचा पहिला हप्ता म्हणून दहा हजार रुपये लाच रक्कम स्वीकारण्याची तयारी दर्शविल्याचे निष्पन्न झाले.
त्यानंतर लाचखोर मनवरे यास पकडण्यासाठी गुरुवारी (३ ऑक्टोंबर) उपअधीक्षक अजित त्रिपुटे यांच्या नेतृत्वाखाली पोलिस अंमलदार चंद्रकांत काळे, उमेश मोरे, बाबासाहेब कराड, रवींद्र निमसे, चालक पोलीस हेडकॉन्स्टेबल दशरथ लाड यांनी सापळा लावला.
तक्रारदाराकडून दहा हजार रुपये लाच स्वीकारताना मनवरे याला पकडण्यात आले असून त्याच्या विरोधात पाथर्डी पोलीस ठाण्यात गुन्हा दाखल करण्यात आला आहे. पुढील तपास लाच लुचपत विभागाचे पोलीस उपाधीक्षक अजित त्रिपुटे करत आहे.
