सण, उत्सवात दागिने घालणे पडतेय महागात…
शनिवार, ०५ ऑक्टोबर
संगमनेर – महाराणा प्रताप चौकात शुक्रवारी संध्याकाळी पावणे आठ वाजण्याच्या सुमारास भरधाव वेगात आलेल्या दोघा दुचाकीस्वारांनी महिलेच्या गळ्यातील ८० हजार रुपये किमतीचे सोन्याचे मिनी गंठण लंपास करण्याचा प्रकार संगमनेरमध्ये समोर आला.
नवरात्र उत्सवाच्या पहिल्याच दिवशी घडलेल्या या प्रकारामुळे उत्सवानिमित्ताने घराबाहेर पडणाऱ्या महिलांची सुरक्षितता धोक्यात आली आहे. दरम्यान या संदर्भात संगमनेर शहर पोलीस ठाण्यात कांता भानुदास शिंदे (वय ५८ वर्ष, रा. आनंदनगर कॉलनी, मालदाड रोड पूर्व, संगमनेर, जि. अहमदनगर) या महिलेने दिलेल्या फिर्यादीवरून अज्ञात दोघा चोरट्याविरोधात गुन्हा दाखल करण्यात आला आहे.
शुक्रवारी (४ ऑक्टोंबर) संध्याकाळी घराबाहेर पडलेल्या महिलेच्या गळ्यातील ८० हजार रुपये किमतीचे सुमारे २० ग्रॅम वजनाचे सोन्याचे मिनी गंठण भरधाव वेगात दुचाकीवरून आलेल्या दोघा चोरट्यांनी लगतच्या महाराणा प्रताप चौकात गळ्यातून ओढत दुचाकीवरून पलायन केले. घटनेनंतर घाबरलेल्या महिलेने शनिवारी शहर पोलीस ठाणे गाठून या संदर्भात पोलिसांना दिलेल्या माहितीवरून गुन्हा दाखल करण्यात आला आहे.
पोलीस उपनिरीक्षक रमेश पाटील या संदर्भात अधिक तपास करत आहे.
