गुरुवार, १० ऑक्टोबर
पुणे – सुनेने न्यायालयात केलेल्या फसवणूक आणि कौटुंबिक हिंसाचाराच्या तक्रारीमुळे आणि न्यायालयाने काढलेल्या नोटीसीमुळे राज्याचे माजी आदिवासी विकासमंत्री व भारतीय जनता पक्षाचे नेते मधुकरराव पिचड, पत्नी कमल आणि संबंधितांच्या यांच्या अडचणीत आगामी होऊ घातलेल्या विधानसभा निवडणुकीच्या पार्श्वभूमीवर वाढ झाली आहे.
पिचड यांनी त्यांच्या द्वितीय पत्नी कमल या आदिवासी नसतांना त्यांचा खोटा व बनावट आदिवासी जातीचा दाखला बनून त्याआधारे आमच्या सून श्रीमती सरोज जितेंद्र पिचड यांची संपत्ती हडप करून फसवणूक केली असल्याचे म्हटले आहे. या संदर्भात श्रीमती पिचड यांनी अनुसूचित जाती जमाती तपासणी समितीचे सह आयुक्त यांच्याकडे २०१८ पासून तसेच शहापूर पोलीस निरीक्षक यांच्याकडे देखील तक्रारी केल्या मात्र राजकीय दबावातून या तक्रारीची दखल घेण्यात आली नाही.
या संदर्भात ज्येष्ठ विधीज्ञ असीम सरोदे यांनी पत्रकार परिषदेत माहिती दिली. पिचड यांची दुसरी पत्नी कमल पिचड या हिंदू मराठा असताना मधुकर पिचड यांनी बनावट कागदपत्रे तयार करून घेतली. त्याचवेळी सून श्रीमती सरोज जितेंद्र पिचड यांच्या बळजबरीने अनेक कागदपत्रांवर सह्या आणि स्वतःच्या ओळखीचा फायदा घेऊन सरकारी रेकॉर्डमध्ये फेरफार करून घेत जमिनी कमल यांच्या नावे करून घेतल्या.
ठाणे आणि नगर जिल्ह्यात असलेल्या या सर्व जमीन मिळकती त्यांनी समृद्धी महामार्गात विक्री करून त्याद्वारे शासनाकडून साधारणतः पाच करोड रुपये घेतले. या जमिनीचा मोबदला वास्तविकता सून सरोज यांना मिळणे अपेक्षित होते. तसेच पिचड यांनी अन्य शेतकऱ्यांच्या देखील मिळतात अशाच प्रकारे बेकायदेशीर बळकावून त्यातून करोडो रुपये मिळवले.
याबाबत २०१८ पासून सहआयुक्त अनुसूचित जाती जमाती तपासणी समितीकडे तक्रारी केल्या आहे मात्र सरकारी अधिकारी पिचड यांच्या दबावाखाली वागतात. त्यामुळे या संदर्भात सरोज पिचड यांनी शहापूरच्या पोलीस निरीक्षकांकडे रीतसर तक्रार देखील केली मात्र या तक्रारीची दखल न घेतल्याने त्यांनी कल्याणच्या जिल्हा व सत्र न्यायालयात तक्रार दाखल केली. तक्रारीची दखल घेत न्यायालयाने मधुकर पिचड, कमल पिचड आणि संबंधितांवर कारवाई का केली जाऊ नये यासंबंधी नोटीस काढली असून पुढील सुनावणी २५ ऑक्टोंबरला होणार आहे.
अश्या प्रकारे कमल पिचड यांनी आदिवासी नसताना आदिवासी जमिनी बेकायदेशीर बळकवून त्यातून करोडो रुपयांचा नफा मिळविला. त्यास मधुकर पिचड यांचे राजकीय पाठबळ असून ते सध्या सत्ताधारी भाजपमध्ये असल्याने त्यांच्यावर पोलीस कारवाई करत नाही. याप्रकरणी न्याय मिळेल याची खात्री नसल्याने सरोज पिचड यांनी न्यायालयात धाव घेतली आहे.
सरोज पिचड यांनी माजी मंत्री मधुकर पिचड यांच्यासह अन्य लोकांविरोधात कौटुंबिक हिंसाचार कायद्यानुसार देखील खटला दाखल केला असल्याचे म्हटले आहे. याप्रकरणी न्यायालयात माजी मंत्री पिचड काय म्हणणे मांडतात याकडे लक्ष लागले आहे.
