मंगळवार, १५ ऑक्टोंबर
प्रवरा नदीपात्रात पोहण्यासाठी गेलेल्या दोन मुलांचा मृत्यू झाला होता. नदीपात्रात या मुलांचा शोध व बचाव सुरू असताना सुगाव बुद्रुक (अकोले) येथे शोध कार्य करणाऱ्या पथकाची बोट उलटून तीन पोलीस अधिकारी कर्मचाऱ्यांचा मृत्यू झाला होता. या दिवंगत कर्मचाऱ्यांच्या कुटुंबीयांना शासनाने नुकसान भरपाई व अन्य लाभ म्हणून गृह विभागाने ४४.६८ लाखाची नुकसान भरपाई मंजूर केली आहे. यासंबंधीचे आदेश नुकतेच काढण्यात आले.
२३ मे २०२४ रोजी अकोले तालुक्यातील सुगाव बुद्रुक येथे ही दुर्घटना घडली होती. पाण्याचा प्रवाहात पोहण्यासाठी गेलेल्या दोघा मुलांचा बुडून मृत्यू झाला होता. या बुडून मृत्यू झालेल्या मुलांपैकी एकाच्या शोधासाठी बचाव पथकाची मदत घेण्यात आली. बचाव कार्य सुरू असताना नदीपात्रातील तीव्र प्रवाहाच्या पाण्याच्या भोवऱ्यात अडकून बचाव कार्याची बोट उलटली. या घटनेत स्थानिक नागरिकासह पोलीस उपनिरीक्षक दर्जाच्या एका व पोलीस शिपाई दर्जाच्या दोघा अधिकारी कर्मचाऱ्यांचा नदीपात्रातील भोवऱ्यात सापडल्याने बुडून मृत्यू झाला होता.
पोलीस उपनिरीक्षक प्रकाश नाना शिंदे (राज्य राखीव पोलीस बल, गट क्रमांक ५, दौंड), पोलीस शिपाई वैभव सुनील वाघ (राज्य राखीव पोलीस बल, गट क्रमांक ६, धुळे) आणि पोलीस शिपाई राहुल गोपीचंद पावरा (राज्य राखीव पोलीस बल, गट क्रमांक ८, नवी मुंबई) अशी शहीद झालेल्या आपत्ती व्यवस्थापनातील पोलीस अधिकारी, कर्मचाऱ्यांची नावे होती.
शासनाने यांना नुकसान भरपाई मंजूर केली असून शासनाच्या आदेशानुसार दिवंगत उपनिरीक्षक प्रकाश शिंदे यांना १७,९६,०००/-, पोलीस शिपाई वैभव वाघ यांना १३,३६,०००/- व पोलीस शिपाई राहुल पावरा यांच्या कुटुंबीयांना १३,३६,०००/- रुपयांची नुकसान भरपाईची शासनाने जाहीर केलेली मदत मिळणार आहे.
