शुक्रवार, १८ ऑक्टोबर
नाशिक – १८ शिक्षकांची वेतन पडताळणी करून त्याची नोंद सेवा पुस्तकात करण्याकरिता प्रत्येकी सातशे रुपये प्रमाणे लाचेची मागणी करून तडजोडीअंती ११ हजार रुपयांची लाच घेणाऱ्या जिल्हा परिषदेतील दोघा अधिकाऱ्यांना लाच लुचपतच्या अधिकाऱ्यांनी रंगेहात पकडले असून त्यांना अटक करण्यात आली आहे.
किरण रंगनाथ दराडे (वय ४० वर्ष, कनिष्ठ लेखाधिकारी, वित्त विभाग) व सचिन प्रभाकर पाटील (वय ४० वर्ष, कनिष्ठ सहाय्यक (लेखा) वित्त विभाग) असे जिल्हा परिषदेतील दोघा लाचखोर अधिकाऱ्यांची नावे आहेत.
लाच लुचपत विभागाकडे तक्रार करणारे तक्रारदार हे शिक्षक असून त्यांच्यासह अठरा शिक्षकांची वेतन पडताळणी करून त्याची नोंद सेवा पुस्तकात करण्यासाठी या सर्वांची सेवा पुस्तके लेखा अधिकारी किरण दराडे यांच्याकडे जमा करण्यात आली होती. १८ शिक्षकांचे वेतन करताना सेवा पुस्तके लेखाधिकारी यांच्याकडे सादर करून ती वेतन पडताळणी मंजूर करून देण्याच्या मोबदल्यात दराडे यांच्या सांगण्यावरून कनिष्ठ सहाय्यक सचिन पाटील यांनी या शिक्षकांकडे प्रत्येकी सातशे रुपयांप्रमाणे १२,६०० रुपयांची मागणी केली होती. तडजोडीअंती ११,००० रुपये लाच घेण्याचे आरोपींनी कबूल केले होते. 
त्यामुळे या दोघा लाचखोरांना पकडण्यासाठी नाशिक लाच लुचपत विभागाच्या पोलीस निरीक्षक मीरा आदमाने यांच्या नेतृत्वाखाली पोलिस हवालदार पंकज पळशीकर, पोलीस हवालदार प्रमोद चव्हाणके, पोलीस हवालदार संदिप वणवे यांनी गुरुवारी सापळा रचला.
लेखा अधिकारी दराडे यांच्या सांगण्यावरून तक्रारदाराकडून लाचेची रक्कम स्वीकारताना सचिन पाटील याला पकडण्यात आले. दोन्ही आरोपीं विरोधात नाशिकच्या भद्रकाली पोलीस ठाण्यात गुन्हा दाखल करण्यात आला आहे.
