निवडणूक विशेष वृत्त | मोहसीन शेख
शुक्रवार, १८ ऑक्टोंबर
सत्ताधारी महायुती आणि विरोधी महाविकास आघाडीच्या जागा वाटपाचा अद्याप तिढा कायम असतानाच वंचित बहुजन आघाडीने मात्र विधानसभा निवडणुकीसाठी उमेदवार जाहीर करण्यात आघाडी घेतली आहे. वंचित चे आतापर्यंत ५१ उमेदवार जाहीर झाले असून तिसऱ्या यादीत अहिल्यानगर जिल्ह्यातील संगमनेर आणि राहुरी मतदार संघासाठी उमेदवार जाहीर करण्यात आले आहे. वंचितने उमेदवार जाहीर करत संगमनेरच्या निवडणुकीत रंगत वाढविली आहे.
वंचित बहुजन आघाडीने राज्यात आत्तापर्यंत सर्वाधिक ५१ जातनिहाय उमेदवार जाहीर केले असून सुरुवातीपासूनच काँग्रेसचा बालेकिल्ला राहिलेल्या आणि सलग आठ टर्म आमदार, माजी मंत्री असलेल्या बाळासाहेब थोरात यांच्या विरोधात मुस्लिम समाजाचे अजीझ अब्दुल व्होरा यांना वंचित ने निवडणुकीच्या मैदानात उतरवले आहे. तर शेजारच्या राहुरी मतदार संघातून भिल्ल समाजाचे अनिल जाधव यांना उमेदवारी जाहीर करण्यात आली. तिसऱ्या यादीत या दोघांना स्थान मिळाले आहे.
संगमनेरमध्ये मोठ्या प्रमाणात असलेले मुस्लिम समाजाचे मतदान लक्षात घेऊन वंचितने अजीझ व्होरा यांना उमेदवारी दिल्याने सातत्याने बाळासाहेब थोरात यांच्यासोबत असलेल्या मुस्लिम समाजातील मतांमध्ये यामुळे मत विभाजन होण्याची शक्यता व्यक्त आहे. त्यामुळे अजीझ व्होरा यांची उमेदवारी बाळासाहेब थोरात यांच्यासाठी डोकेदुखी ठरू शकते. 
वंचित बहुजन आघाडीचे संगमनेर शहराध्यक्ष असलेल्या अजीझ व्होरा यांनी प्रचारास सुरुवात केली आहे. वंचित बहुजन आघाडीच्या हक्काच्या मतांसह मुस्लिम समाजातील मतांकडे त्यांचे प्रमुख लक्ष असेल.
वंचित बहुजन आघाडीने जाहीर केलेल्या तिसऱ्या यादीत या उमेदवारांचा आहे समावेश…(यादी झूम करून बघा)
