मंगळवार, २८ ऑक्टोंबर
संगमनेर – राज्याचे माजी मंत्री आमदार बाळासाहेब थोरात यांनी मंगळवारी धनत्रयोदशीच्या मुहूर्तावर अखेरच्या दिवशी आपला उमेदवारी अर्ज दाखल केला आहे. थोरात या मतदारसंघात महाविकास आघाडीचे उमेदवार असून नवव्यांदा ते निवडणुकीला सामोरे जात आहेत. आतापर्यंत सलगपणे आठ वेळा त्यांनी या मतदार संघाचे प्रतिनिधित्व केले आहे. 
थोरात यांच्या विरोधात मतदार संघात मोठ्या सभा घेत टायगर अभी… म्हणत नगर दक्षिणचे माजी खासदार सुजय विखे यांनी मोठ्या डरकाळ्या फोडल्या होत्या. मात्र शेवटच्या क्षणापर्यंत त्यांनी आपला उमेदवारी अर्ज दाखल न केल्याने या डरकाळ्या फोल ठरल्या. टायगर अभी… नव्हे तर मैदान छोडके भाग गया! अशा प्रतिक्रिया महाविकास आघाडीच्या कार्यकर्त्यांकडून व्यक्त होत आहे.
थोरात यांचा उमेदवारी अर्ज दाखल करतेवेळी त्यांच्या समवेत महाविकास आघाडीच्या कार्यकर्त्यांनी मोठे गर्दी केली होती. इतर निवडणूक निर्णय अधिकाऱ्यांच्या कक्षात निवडक लोकांना प्रवेश देण्यात येत असल्याने समर्थक कार्यकर्ते बाहेर थांबले होते. 
यावेळी थोरात यांच्या समवेत नाशिक पदवीधर मतदारसंघाचे आमदार सत्यजित तांबे, काँग्रेसचे शहराध्यक्ष सोमेश्वर दिवटे, तालुका अध्यक्ष डॉ. जयश्री थोरात, माजी नगराध्यक्ष दिलीप पुंड, शिवसेनेचे माजी शहर प्रमुख अमर कतारी, युवा सेनेचे जिल्हाध्यक्ष अमित चव्हाण, शिवसेनेचे शहर संघटक तथा युवा सेना उपजिल्हा समन्वयक रवींद्र (पप्पू) कानकाटे आदींसह महाविकास आघाडीचे कार्यकर्ते मोठ्या संख्येने उपस्थित होते.
