गुरुवार, ३१ ऑक्टोबर
महात्मा गांधी राष्ट्रीय रोजगार हमी योजनेअंतर्गत मंजूर विहिरीच्या कामाच्या बिलाची फाईल मंजूर करून देण्यासाठी सहा हजार रुपयांची लाच मागणाऱ्या लाचखोर अधिकाऱ्याला एसीबीने सापळा रचून ताब्यात घेत अटक केली आहे.
महेश गजानन देवगिरीकर (वय ३५ वर्ष) असे लाचखोर अधिकाऱ्याचे नाव आहे. छत्रपती संभाजी नगरच्या सिल्लोड पंचायत समितीमध्ये एसीबीने बुधवारी (३० ऑक्टोबर) लाचेची ही कारवाई केली.
तक्रारदाराच्या आईच्या नावावर असलेल्या शेतीमध्ये महात्मा गांधी राष्ट्रीय ग्रामीण रोजगार हमी योजनेअंतर्गत मंजूर विहिरीचे काम करण्यात आले होते.
या कुशल कामाच्या एक लाख पाच हजार रुपयांच्या बिलाची फाईल मंजूर करून देण्यासाठी आरोपी महेश देवगिरीकर याने सहा हजार रुपये लाचेची तक्रारदाराकडे मागणी केली होती. त्यामुळे तक्रारदाराने एसीबीकडे तक्रार दाखल केली होती.
एसीबीने लाचखोर महेश देवगिरीकर याला पकडण्यासाठी सिल्लोड पंचायत समितीमध्ये सापळा लावला होता. तक्रारदाराने केलेल्या तक्रारीची पडताळणी करत सापळा रचून महेश देवगिरीकर याला एसीबीने ताब्यात घेतले.
देवगिरीकर यांच्या विरोधात सिल्लोड पोलीस ठाण्यात गुन्हा दाखल करण्यात आला असून लाचेची ही कारवाई पोलीस अधीक्षक संदीप आटोळे, अपर पोलीस अधीक्षक मुकुंद आघाव, उपअधीक्षक सुरेश नाईकनवरे यांच्या मार्गदर्शनाखाली पोलीस निरीक्षक अमोल धस, चैनसिंग घुसिंगे, युवराज हिवाळे चालक देवसिंग ठाकूर यांनी केली.
