शनिवार, ०२ नोव्हेंबर
राहुरी – भाऊबीजेसाठी बहिणीला साडी घेऊन तो आपल्या दुचाकीवरून संगमनेरला येत होता. बहिणीकडे येऊन भाऊबीज साजरी करण्यापूर्वीच काळाने त्याच्यावर घाला घातला. राहुरीजवळ झालेल्या अपघातात दुचाकीस्वाराचा मृत्यू झाला आहे. या घटनेमुळे ऐन दीपावलीत दुःखद वातावरण निर्माण झाले.
अपघातामुळे भाऊबीज साजरी करण्यापूर्वीच या बहिण भावाची ताटातूट झाली. शुक्रवारी संध्याकाळी राहुरी तालुक्यातील चिंचोली फाटा शिवारात दुचाकीस्वाराला अज्ञात वाहनाने दिलेल्या धडकेत मृत्यू झालेल्या तरुणाचे नाव दत्ता पांडुरंग मोरे असे आहे.
याबाबत समजलेली माहिती अशी की, बीड जिल्ह्यातील शिरूर कासार येथील कान्होबाची वाडी येथील तरुण दत्ता पांडुरंग मोरे (वय २७) हा १ नोव्हेंबरच्या रात्री एम.एच.१७- सी- यु-३७६४ या क्रमांकाच्या दुचाकीवरून संगमनेर येथे भावबीजेसाठी बहिणीकडे येत होता.
नगर-मनमाड मार्गावर चिंचोली फाटा येथील एकेरी वाहतूक सुरू असलेल्या ठिकाणी अज्ञात वाहनाने त्याच्या दुचाकीला जोराची धडक दिल्याने त्याचा जागीच मृत्यू झाला.
घटनास्थळी जमलेल्या स्थानिक नागरिकांनी रुग्णवाहिकेतून मृतदेह शवविच्छेदनासाठी राहुरी येथे पाठविण्यात आला. घटनास्थळी पोलीस हेडकॉन्स्टेबल सोमनाथ जायभाये यांनी पंचनामा केला.
