बुधवार, ०६ नोव्हेंबर
संगमनेर – संगमनेर तालुक्यात बिबट्यांचा उपद्रव मोठ्या प्रमाणात वाढला आहे. मोठ्या प्रमाणात मनुष्यहानी झाल्याच्या घटना समोर आल्या आहेत. मंगळवारी रात्री शहरालगत असलेला खांडगाव शिवारातील बाह्यवळण मार्ग ओलांडत असताना अज्ञात वाहनाने एका दोन वर्षे बिबट्याच्या मादीला जोराची धडक दिली. जखमी अवस्थेत रस्त्याच्या कडेला पडलेल्या बिबट्याची ही मादी रस्त्याने येणाऱ्या-जाणाऱ्यांच्या निदर्शनास आली. त्यामुळे जखमी मादी बिबट्याला पाहण्यासाठी नागरिकांची मोठी गर्दी जमली. अनेक जण आपल्या दुचाकीच्या हेडलाईटच्या प्रकाशात जखमी बिबट्याच्या मादीला बघत होते.
यावेळी चवताळलेल्या जखमी अवस्थेत मादी बिबट्याने जमावावर हल्ला केला. यात तिघेजण जखमी झाले. दोघा जखमींवर रुग्णालयात उपचार करण्यात आले आहे. दादू मधुकर रूपवते आणि गोविंद बाबाराजा गायकवाड अशी दोघा जखमींची नावे असून किरकोळ जखमी असलेल्या एकाचे नाव समजू शकले नाही. 
नाशिक-पुणे मार्गावरील मंगळवारी रात्री आठ वाजता सुमारास खांडगाव शिवारात हा प्रकार घडला. जखमी अवस्थेतील बिबट्याचे फोटो व्हिडिओ आपल्या मोबाईल मध्ये चित्रित करण्याचा प्रयत्न केला. अनेकांनी जखमी अवस्थेत त्याला डिवचण्याचा प्रयत्न केला. मात्र गर्दी बघून बिबट्या चवताळला होता. मागील बिबट्या पकडण्याचा अनुभव लक्षात घेत बिबट्याला धावलेल्यांवर त्याने त्या अवस्थेत हल्ला करत एकाच्या पायाला पकडले. तर दुसऱ्याच्या अंगावर पंजा मारला. त्यामुळे हे दोघे आणि आणखी एक जण किरकोळ स्वरूपात असे तिघेजण जखमी झाले. तर दोन्ही जखमींना उपचारासाठी रुग्णालयात आणण्यात आले होते.
दरम्यान या घटनेची माहिती मिळताच वनविभागाच्या रेस्क्यू टीमने घटनास्थळी धाव घेऊन नागरिकांची गर्दी बाजूला सारत बिबट्या भोवती जाळी लावून जखमी अवस्थेतील मादी बिबट्याला जेरबंद केले. जखमी अवस्थेतील बिबट्याला संगमनेर खुर्द येथील रोपवाटिकेत आणून त्याच्यावर उपचार करण्यात आले. वैद्यकीय तपासणीअंती बिबट्याच्या पायाला आणि डोक्याला गंभीर इजा झाल्याचे आढळून आले.
अपघातानंतर जखमी बिबटया रस्त्याच्या कडेला बसला होता. अतिउत्साही तरुण जवळ गेल्याने त्याने हल्ला केला. बिबट्याच्या पायाला डोक्याला मार लागला आहे. त्याचेवर प्राथमिक उपचार केले असून बिबट्याला उपचारासाठी नाशिक येथे नेण्यात येणार आहे. – सचिन लोंढे वनपरिक्षेत्र अधिकारी भाग १
