गुरुवार, ७ नोव्हेंबर
नाशिक – विधानसभा निवडणुकीत ईव्हीएम मशीन हॅक करून उमेदवाराला निवडून आणतो असे सांगत त्याने ४२ लाख रुपयांच्या खंडणीची मागणी केली. पैसे देण्यास नकार दिल्यावर त्याने नाशिक मधील शिवसेना ठाकरे गटाचे उमेदवार वसंत गिते यांना विधान सभा निवडणुकीत मशिन हॅक करून पाडण्याची धमकी दिली. धमकी देणाऱ्या परप्रांतीयाला नाशिक पोलिसांनी शोध घेत बेड्या ठोकल्या आहेत.
भगवानसिंग नारायण चव्हाण (वय ३४ मुळ रा. अजमेर राजस्थान हल्ली विठू माऊली कॉलनी, मखमलाबाद, म्हसरूळ लिंकरोड) असे खंडणी मागत धमकी देणाऱ्या संशयिताचे नाव आहे. चव्हाण याला शहर गुन्हे शाखेच्या युनिट १ च्या पथकाने अल्पावधीत संशयितास मखमलाबाद शिवारातून हुडकून काढले असून, त्यास मुंबईनाका पोलीसांच्या स्वाधिन करण्यात आले आहे.
नाशिकमधून उद्धव बाळासाहेब ठाकरे यांच्या शिवसेनेकडून वसंत गीते निवडणूक लढवत आहे. या निवडणुकीत विजय मिळवून देण्याची ग्वाही देत संशयिताने ४२ लाखाची खंडणी मागितली होती. मात्र त्यास पैसे देण्यास नकार देण्यात आल्याने त्याने पराभव करण्याची धमकी देत पोबारा केला होता.
झटपट पैसे मिळविण्याच्या नादात आरोपीने हा गुन्हा केल्याचे समोर येत असून अधिक तपास उपनिरीक्षक रविंद्र बागुल करीत आहेत. गेल्या काही दिवसांपासून मार्बलचे काम करण्यासाठी नाशिक शहरात आलेल्या राजस्थानी चव्हाण याने मंगळवारी (दि.५) दुपारच्या सुमारास मुंबईनाका परिसरातील शिवसेना उध्दव ठाकरे गटाच्या मध्य नाशिक मतदार संघाचे उमेदवार वसंत गिते यांचे संपर्क कार्यालय गाठले होते. प्रचार कार्यालय प्रमुख आनंद शिरसाठ यांची भेट घेत त्याने निवडणुकीत ईव्हीएम मशिन हॅक करून पडलेल्या दहा मतदानापैकी काही मते आपोआप गीते यांच्या खात्यात जमा होतील, असे सांगत उमेदवारास निवडून आणण्याची ग्वाही दिली.
त्याने या कामाच्या मोबदल्यात ४२ लाख रूपये द्यावे लागतील तसेच अॅडव्हॉन्स म्हणून पाच लाख रूपयांची तात्काळ मागणी केली. कार्यालय प्रमुख शिरसाठ यांनी खातरजमा करीत त्यास पैसे देण्यास नकार दिल्याने संशयिताने शिरसाठ यांना पैसे न दिल्यास निवडणुकीचे प्रोग्रामिंग करणारे माझे ओळखीचे असून ईव्हीएम मशिन हॅक करून तुमच्या उमेदवाराचा पराभूत करेन अशी धमकी देत धुम ठोकली होती. 
या संदर्भात शिरसाट यांच्या तक्रारीवरून मुंबई नाका पोलीस ठाण्यात गुन्हा दाखल करण्यात आला निवडणूक आणि ईव्हीएम शी संबंधित प्रकरण असल्याने पोलीस आयुक्त संदीप कर्णिक यांनी याची गंभीर दखल घेत संशयित आरोपीचा शोध घेण्याच्या सूचना पोलिसांना केल्या होत्या. त्यामुळे नाशिकची पोलीस यंत्रणा कामाला लागली होती.
हा गुन्हा शहर गुन्हे शाखेच्या युनिट १ च्या पथकाकडे वर्ग करण्यात आल्याने वरिष्ठ निरीक्षक मधुकर कड यांच्या मार्गदर्शनाखाली पथके संशयिताच्या शोधार्थ रवाना करण्यात आली होती.
मखमलाबाद शिवारात संशयित वास्तव्यास असल्याची माहिती मिळाल्याने पथकांनी परिसर पिंजून काढत विठू माऊली कॉलनी भागात संशयिताच्या मुसक्या आवळल्या आहेत. आरोपीला मुंबई नाका पोलिसांच्या ताब्यात देण्यात आले आहे.
