गुरुवार, १४ नोव्हेंबर
संगमनेर – प्रतिनिधी
विधानसभा निवडणुकीसाठी राज्यभरात २० नोव्हेंबरला मतदान होत आहे. तत्पूर्वी संगमनेर विधानसभा मतदारसंघात गृह मतदानाला सुरुवात झाली आहे. गुरुवारी पहिल्याच दिवशी १२२ मतदारांनी आपले मतदान नोंदविले असल्याची माहिती निवडणूक निर्णय अधिकारी शैलेश हिंगे यांनी दिली आहे.
गृह मतदान करणाऱ्यांमध्ये ८५ वर्षावरील ९८ जेष्ठ नागरिकांचा तर २४ दिव्यांग नागरिक मतदारांचा समावेश आहे.
विधानसभा सार्वत्रिक निवडणुकीत मतदानाचा टक्का वाढावा व मतदानापासून कोणीही मतदार वंचित राहू नये, यासाठी लोकसभा निवडणुकीप्रमाणेच विधानसभा निवडणुकीतही ८५ वर्षांवरील व दिव्यांग नागरिक जे मतदान केंद्रापर्यत पोहोचू शकत नाही अशा मतदारांसाठी घरुनच मतदान करण्याची सोय उपलब्ध करुन देण्यात आली आहे.
यासाठी नमूना १२ डी भरून घरूनच मतदान करण्याची सुविधा उपलब्ध करून देण्यात आली आहे. यासाठी गुरुवारी पहिल्याच दिवशी निवडणूक कामासाठी नियुक्ती केलेल्या कर्मचाऱ्यांनी घरोघर जात या मतदारांचे मतदान नोंदवून घेतले असून ते मतदान मतभेद बंद झाले आहे. मतमोजणी वेळी या मतदानाची मोजणी केली जाईल.
निवडणूक निर्णय अधिकारी शैलेश हिंगे, सहायक निवडणूक निर्णय अधिकारी धीरज मांजरे यांच्या मार्गदर्शनाखाली संगमनेर नगर परिषदेचे मुख्याधिकारी तथा समन्वय अधिकारी रामदास कोकरे, नायब तहसीलदार संदीप भांगरे, अनुप गिरी, गृह मतदान प्रक्रियेवर लक्ष ठेवून आहेत.
तीन दिवस चालणार प्रक्रिया…
संगमनेर विधानसभा मतदारसंघात गृह मतदानासाठी २५२ मतदारांनी नोंदणी केली आहे. १४ ते १६ नोव्हेंबर या तीन दिवसांच्या कालावधीत घरोघरी जाऊन निवडणूक कर्मचाऱ्यांकडून गृह मतदान नोंदवून घेतले जाणार आहे. मतदान केंद्राध्यक्ष, मतदान अधिकारी व सूक्ष्म निरीक्षक यांचा समावेश असलेल्या १० पथकांच्या माध्यमातून गृह मतदान मोहीम राबविण्यात येत आहे. गृह मतदानांसाठी टपाली मतपत्रिकेचा वापर करण्यात येत आहे. – शैलेश हिंगे, निवडणूक निर्णय अधिकारी, संगमनेर विधानसभा मतदारसंघ.
