शुक्रवार, १५ नोव्हेंबर
अहिल्यानगर – विधानसभा निवडणुकीच्या अनुषंगाने व्हाट्सअप ग्रुप वर विविध चर्चांना उधाण आले आहे. या पार्श्वभूमीवर व्हाट्सअप ग्रुप वरून खोटी माहिती प्रसारित केल्याने व्हाट्सअप ग्रुपच्या सदस्यांवर अहिल्यानगरच्या तोफखाना पोलीस ठाण्यात गुन्हा दाखल करण्यात आला आहे.
जिल्हा ग्राहक सुरक्षा या व्हाट्सअप ग्रुपच्या माध्यमातून हा प्रकार घडला असल्याची माहिती अहमदनगर शहर विधानसभा मतदारसंघाचे निवडणूक निर्णय अधिकारी सुधीर पाटील यांनी दिली आहे.
काय होता मेसेज… जिल्हा ग्राहक सुरक्षा या व्हाट्सअप ग्रुप वर एका मोबाईल क्रमांकावरून मतदार केंद्रावर ज्याचे नाव यादीतून वगळली आहेत, म्हणजेच यादीत नावावर डिलीट शिक्का लागला आहे ते मतदार मतदान केंद्रावर फॉर्म क्र. १७ भरुन आपले मतदार ओळखपत्र दाखवून मतदान करुन शकणार आहेत, अशा आशयाचा संदेश प्रसारित करण्यात आला होता.
निवडणुकीमध्ये अशी कोणतीही तरतूद नसल्याने निवडणुकीच्या मतदान प्रक्रियेवर परिणाम करण्याचे तसेच मतदान यंत्रणेवर ताण निर्माण करण्याच्या उद्देशाने मतदारांमध्ये खोटी माहिती प्रसारित केल्यामुळे मतदारसंघाचे सहायक निवडणूक निर्णय अधिकारी विकास पांडूरंग पाटील यांच्या तक्रारीवरुन हा गुन्हा पोलीस स्टेशनमध्ये नोंदविण्यात आला आहे.
निवडणुकीच्या अनुषंगाने आचारसंहिता सुरू असून निवडणूक प्रक्रियेबाबत कोणीही खोटी माहिती प्रसारित करू नये आणि असे संदेश अग्रेशितही करू नये, असे आवाहनही करण्यात आले आहे.
