नागपूर – मुस्लीम मतदारांना प्रभावित करून महाविकास आघाडी वोट जिहाद करीत असल्याचा आरोप करत आपल्याला एक होऊन त्या विरोधात धर्मयुद्ध पुकाराव लागेल, असे राज्याचे उपमुख्यमंत्री देवेंद्र फडणवीस यांनी म्हटले आहे.
नागपूर मधून निवडणूक लढविणाऱ्या उपमुख्यमंत्री देवेंद्र फडणवीस यांनी शनिवारी नागपूरमध्ये प्रचार रॅली काढली होती. या रॅली त्यांनी पुन्हा एकदा वोट जिहाद संदर्भात पुनरुच्चार केला.
फडणवीस म्हणाले, महाविकास आघाडीचे नेते शरद पवार, उद्धव ठाकरे आणि काँग्रेस वोट जिहाद करीत असून ते खेदजनक आहे. निवडणुकीच्या काळात इतके लांगुलचालन यापूर्वी आम्ही कधी बघितले नव्हते. अल्पसंख्याकांची मते मिळवण्यासाठी महाविकास आघाडी असले प्रकार करीत असेल तर त्याविरुद्ध आपल्याला एक व्हावे लागेल. धर्मयुद्ध पुकारावे लागेल.
ऑल इंडिया मुस्लीम पर्सनल लॉ बोर्डाचे प्रमुख सज्जाद नोमानी यांनी महाविकास आघाडीला जाहीर समर्थन दिले आहे. यासंदर्भातील व्हिडीओ देवेंद्र फडणवीस यांनी पुण्यातील खडकवासला येथील प्रचारसभेत दाखवला होता.
मविआकडून वोट जिहादचा नारा दिला जात असताना आता आपल्यालाही मतांचे धर्मयुद्ध लढावे लागेल, असे फडणवीस यापूर्वीच्या सभेत म्हणाले होते. नागपूर मध्ये प्रचार रॅलीत त्यांनी पुन्हा एकदा आपल्या विधाना संदर्भात पुनरुच्चार केला आहे.
बटेंगे तो कटेंगे, एक है तो सेफ है, मुस्लिम वोट जिहाद यामुळे ही निवडणूक विकास कामे, राज्यातील नागरिकांचे प्रश्न या ऐवजी धर्मांवर येऊन ठेपली असल्याचे दिसत आहे.
