बुधवार, २० नोव्हेंबर
संगमनेर विधानसभा मतदारसंघ बुधवारी झालेल्या मतदानात सरासरी ७४.५८ टक्के मतदान झाल्याची माहिती निवडणूक निर्णय अधिकारी शैलेश हिंगे यांनी दिली. अंतिम आकडेवारी येण्यास उशीर लागणार असल्याची माहिती देण्यात आली आहे. संध्याकाळी मतदानाची वेळ संपण्यापूर्वी काही मतदार केंद्रांवर मतदारांच्या रांगा लागल्या होत्या. 
संगमनेर विधानसभा मतदारसंघातील राज्याचे माजी मंत्री, काँग्रेसचे ज्येष्ठ नेते आमदार बाळासाहेब थोरात सलगपणे नवव्यांदा निवडणूक लढवत आहे. या मतदारसंघातून नगर दक्षिणचे माजी खासदार सुजय विखे इच्छुक होते. मात्र त्यांना भारतीय जनता पक्षाने संधी दिली नाही तसेच जागा वाटपात ही जागा शिवसेना शिंदे गटाला गेल्यानंतर या जागेवर विखे समर्थक असलेल्या अमोल खताळ यांना उमेदवारी देण्यात आली होती. या दोघांमध्ये प्रमुख लढत झाली असली तरी थोरात यांच्यासाठी ही निवडणूक एकतर्फी असल्याचे म्हटले जात असून या निवडणुकीत थोरात यांचे मताधिक्य किती राहते याची उत्सुकता आहे.
थोरात खताळ यांच्या व्यतिरिक्त या मतदारसंघात वंचित बहुजन आघाडीकडून अजीज ओहरा, महाराष्ट्र नवनिर्माण सेनेकडून योगेश सूर्यवंशी यांच्यासह एकूण १३ उमेदवार निवडणुकीच्या रिंगणात होते. 
सकाळी पहिला दोन तासात नऊ वाजेपर्यंत या मतदारसंघात ६.९४, सकाळी ११ वाजेपर्यंत २०.६५, दुपारी १ वाजेपर्यंत ३४.९३, दुपारी ३ वाजेपर्यंत ५०.६० तर संध्याकाळी पाच वाजेपर्यंत ६४.१३, संध्याकाळी सहा वाजेपर्यंत ७४.५७ टक्के मतदान झाल्याची नोंद झाली होती. अद्याप अंतिम आकडेवारी समोर आली नसून ती काही वेळातच समोर येईल.
