गुरुवार २१ नोव्हेंबर – संगमनेर
बुधवारी झालेल्या विधानसभा निवडणुकीसाठी संगमनेर विधानसभा मतदार संघात झालेल्या मतदानाची अंतिम आकडेवारी समोर आली आहे. गुरुवारी संध्याकाळी समोर आलेल्या या आकडेवारीत संगमनेरमध्ये ७५.१९ टक्के मतदान झाल्याची माहिती निवडणूक निर्णय अधिकारी शैलेश हिंगे यांनी दिली आहे. 
राज्याचे माजी मंत्री व काँग्रेसचे ज्येष्ठ नेते आमदार बाळासाहेब थोरात या विधानसभा मतदारसंघातून निवडणूक लढवत आहे. गेल्या विधानसभा निवडणुकीच्या तुलनेत यावेळी मतदानात मोठी वाढ झाली आहे. 
संगमनेर विधानसभा मतदारसंघात १,४८२८४ (पुरुष), १,४०,८८९ (महिला) व १ (अन्य) असे एकूण २,८९,१७४ इतके मतदान होते त्यापैकी बुधवारी झालेल्या मतदानानंतर १,१४१८२ (पुरुष), १,०३,२५० (महिला) व ० (अन्य) अशा एकूण २,१७,४३२ इतक्या मतदारांनी मतदान केल्याचे समोर आले आहे. मतदार संघातील या मतदानाची टक्केवारी ७५.१९% इतके राहिली आहे.
महाविकास आघाडीचे बाळासाहेब थोरात आणि महायुतीचे अमोल खताळ यांच्यात प्रमुख लढत झाली असून शनिवारी मतमोजणी होणार असून या मतदारसंघाचा नवा लोकप्रतिनिधी समोर येणार आहे. थोरात आणि खताळ यांच्यासह एकूण १३ उमेदवार निवडणूक रिंगणात होते. या सर्वांचे भवितव्य मतदान यंत्रात बंद आहे.
