बुधवार, ११ डिसेंबर – संगमनेर
संगमनेरमधील उच्चभ्रूची वसाहत समजल्या जाणाऱ्या गोल्डन सिटीतील शिक्षकाचा शिवपुष्प बंगला अज्ञात चोरट्याने दिवसाढवळ्या फोडत ५० ग्रॅम वजनाच्या सोन्या-चांदीच्या दागिन्यांसह १५ हजार रुपयांची रोकड लांबविण्याची घटना समोर आली आहे. शिक्षकाने दिलेल्या तक्रारीवरून संगमनेर शहर पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे. 
गेल्या काही दिवसांपासून संगमनेर शहरात दागिने चोरीच्या तसेच दुचाकी चोरीच्या घटना वारंवार घडत असताना त्यातच आता दिवसाढवळ्या चोरट्यांनी बंद घरे लक्ष केले असल्याचे समोर येत आहे. दरम्यान या संदर्भात पोलिसांकडून मोठी गुप्तता राखली जात आहे. ७ डिसेंबरला घडलेल्या चोरीच्या दोन घटनादेखील तब्बल तीन दिवसानंतर समोर आल्या आहे.
शिक्षक असलेल्या विलास कारभारी काळे यांनी दिलेल्या तक्रारीवरून संगमनेर शहर पोलीस ठाण्यात अनोळखी चोरट्याविरुद्ध चोरीचा गुन्हा दाखल करण्यात आला आहे. यासंदर्भात अधिक माहिती अशी, विलास काळे हे आपल्या पत्नीसह शनिवारी सकाळी ११ वाजता घराचा दरवाजा बंद करून एका विवाह समारंभासाठी पोहेगाव (ता. कोपरगाव) येथे गेले होते. सायंकाळी साडेपाच वाजण्याच्या दरम्यान ते पुन्हा घरी परतले असता घराचा दरवाजाचा कडी कोयंडा उचकटलेला दिसून आला.
त्यामुळे काळे पती-पत्नीने घरात जाऊन बघितले असता आतील सामान अस्ताव्यस्त पडले होते. तसेच बेडरूममधील कपाटात ठेवलेली १५ ग्रॅम वजनाची सोन्याची चैन, पाच ग्रॅम वजनाचे कानातले, ३० ग्रॅम वजनाचे चांदीचे दोन शिक्के व पंधरा हजार रुपयांची रोकड लंपास झाल्याचे त्यांना आढळून आले.
शेजारी राहणाऱ्या कानवडे यांच्याकडेही चोरी – दरम्यान विलास काळे यांच्या घराशेजारी राहणाऱ्या भागवत सोमनाथ कानवडे यांच्याकडे देखील दुपारी बारा ते दीड वाजण्याच्या दरम्यान अज्ञात चोरट्याने कडी कोयंडा उचकटून रोख रक्कम चोरून नेल्याचे काळे यांच्या फिर्यादीत म्हटले आहे. या संदर्भात संगमनेर शहर पोलीस ठाण्यातील पोलीस हवालदार हासे पुढील तपास करत आहे.
