गुरुवार १२ डिसेंबर
संगमनेर – संगमनेरच्या मालपाणी हेल्थ क्लब अँड रिसॉर्ट मधून तब्बल सहा लाख रुपयांची चोरी झाल्याचा प्रकार समोर आल्यानंतर पोलिसांनी संशयित आरोपींकडे केलेल्या तपासानंतर ही चोरी उघड करण्यात पोलिसांना यश आले. हेल्थ क्लब अँड रिसॉर्ट मध्ये काम करणाऱ्या रिसेप्शनिस्टने ही चोरी केल्याच्या समोर आले असून पोलिसांनी त्याला अटक केली आहे. तसेच त्याच्याकडून रोकड हस्तगत करण्यात पोलिसांना यश आले. 
काय होती घटना – शहरालगत असलेल्या मालपाणी हेल्थ क्लब अँड रिसॉर्ट मधून रविवारी सकाळी सात ते मंगळवारी दुपारी बारा वाजण्याच्या दरम्यान व्यवस्थापक सचिन सदाशिव गाडे यांच्या केबिनमधील तिजोरीतून सहा लाख रुपयांची रोकड चोरी गेली होती.
यांच्यावर व्यक्त केला होता संशय – यासंदर्भात मालपाणी हेल्थ क्लबचे कर्मचारी सचिन गाडे यांनी संगमनेर शहर पोलीस ठाण्यात बुधवारी रात्री दाखल केलेल्या तक्रारीवरून तिजोरीच्या चाव्या ताब्यात असलेल्या विशाल चंद्रकांत शिंदे, सचिन अशोक काळे व प्रथमेश संजय मिसाळ या तिघा रिसेप्शनिस्ट असलेल्या संशयीतांविरुद्ध गुन्हा दाखल करण्यात आला होता. 
या संशयिताने केली चोरी – घटनेचे गांभीर्य लक्षात घेऊन पोलिसांनी या संदर्भात चाव्या ताब्यात असलेल्या तिघा संशयीतांकडे केलेल्या चौकशीनंतर प्रथमेश मिसाळ याने हा गुन्हा केल्याचे समोर आले. पोलिसांनी त्याच्याकडून सहा लाखांपैकी ५ लाख ७७ हजार रुपयांची रोकड हस्तगत केली आहे. उर्वरित पैसे त्याने खर्च केल्याचे समोर आले.
यांचा संबंध नाही – दरम्यान गुन्हा दाखल करण्यात आलेल्या विशाल चंद्रकांत शिंदे आणि सचिन अशोक काळे यांचा या चोरीच्या प्रकरणाशी काही संबंध आढळून आला नसल्याचे निष्पन्न झाले असल्याचे पोलिसांनी सांगितले आहे. अटक केलेल्या प्रथमेश मिसाळ याला न्यायालयासमोर हजर करण्यात आले होते. आरोपीला न्यायालयाने न्यायालयीन कोठडी दिली.
यांनी केला तपास – पोलीस उपाधीक्षक कुणाल सोनवणे यांच्या मार्गदर्शनाखाली पोलीस निरीक्षक रवींद्र देशमुख, पोलीस उपनिरीक्षक रावसाहेब लोखंडे, पोलीस कॉन्स्टेबल आत्माराम पवार व पोलीस कॉन्स्टेबल विशाल कर्पे यांनी याप्रकरणी तपास करत गुन्ह्याचा उलगडा केला. पोलीस उपनिरीक्षक लोखंडे पुढील तपास करत आहे.
