सोमवार १६ डिसेंबर
सासऱ्याला निवृत्तीनंतर मिळालेले पैसे आपल्या नावावर करावे तसेच एक एकर जमीन आपल्या नावावर करावी, या मागणीसाठी सुनेने आणि तिच्या नातेवाईकांनी खोटा गुन्हा दाखल करत दिलेल्या त्रासाला वैतागून नैराश्य आलेल्या सासऱ्याने विष पिऊन आपली जीवनयात्रा संपवण्याचा दुर्दैवी प्रकार राहुरी तालुक्यात घडला आहे. भाऊसाहेब ब्राम्हणे असे दुर्दैवी सासऱ्याचे नाव आहे.
याबाबत भाऊसाहेब ब्राम्हणे यांची पत्नी लताबाई ब्राम्हणे (रा. चिंचोलीफाटा, ता. राहुरी) यांनी पोलिसात फिर्याद दिली आहे. 
त्यांनी आपल्या फिर्यादीत म्हटले आहे की, आपले पती हे ए.डी.सी.सी. बँकेत नोकरीला होते. २०१६ साली ते सेवानिवृत्त झाले. मुलगा विशाल याचा विवाह १३ वर्षांपूर्वी चंद्रकांत ओहोळ (रा. फत्याबाद, ता. श्रीरामपूर) यांची मुलगी वर्षा हिच्याबरोबर झाला. चार-पाच वर्षे सून नीट नांदली. २०१६ ला पती सेवानिवृत्त झाल्यामुळे त्यांना पैसे मिळाले. तेव्हा सून वर्षा हिने माझ्या नावावर २० लाख रूपये टाका व एक एकर जमीन नावावर करून द्या, असा आग्रह करू लागली. 
तेव्हा माझ्या पतीने तिला समजावून सांगितले की, हे पैसे तुमचेच आहे, आता तुला कशाला लागतात ? जेव्हा कशाला लागतील तेव्हा आम्ही तुला देऊ. याचा राग आल्याने तिने घरात शिवीगाळ करत नंतर तिच्या वडिलांना, आमच्या पुतण्याला घरी बोलावून घेतले व सदर पैसे आपल्या नावावर टाकण्यासाठी त्यांना आपल्या पतीला सांगायला लावले. त्यांनाही हे पैसे त्यांचेच आहे, गरज असेल तेव्हा देऊ असे सांगितले. परंतु सून वर्षा हिने त्यानंतरही शिवीगाळ, दमदाटी घरात सुरूच ठेवली. सून, तिचे वडील, पुतण्या तसेच मामा यांनी त्रास देणे चालूच ठेवले. या त्रासाला वैतागून मी व पती आम्ही दोघे राहुरी फॅक्टरी येथे रहायला आलो.
दरम्यान १२ नोव्हेंबरला सून वर्षा हिने वडील चंद्रकांत दादा ओहोळ, पुतण्या सुनील ब्राम्हणे व तिचे मामा राजेंद्र दगडू भोसले यांच्या सांगण्यावरून आपल्याला जिवंत जाळून मारण्याचा प्रयत्न केल्याचा खोटा गुन्हा भाऊसाहेब ब्राम्हणे यांच्यावर दाखल केला. या खोट्या गुन्हयामुळे पती नैराश्यग्रस्त झाले होते. ९ डिसेंबरला ते दुपारी २.३० ला राहुरी कारखाना येथे चौकात जाऊन येतो असे सांगत बाहेर पडले ते परत आलेच नाही.
त्याबद्दल आपण हरवल्याची तक्रारही दाखल केली. १३ डिसेंबरला घोरपडवाडी शिवारात भाऊसाहेब ब्राम्हणे यांचा मृतदेह आढळून आला. शवविच्छेदनात विषारी औषध घेऊन आत्महत्या केल्याचे आढळून आले. त्यांच्या खिशात आढळलेल्या चिठ्ठीवरून सून वर्षा विशाल ब्राम्हणे, व्याही चंद्रकांत ओहोळ, पुतण्या सुनील एकनाथ ब्राम्हणे, मामा राजेंद्र दगडू भोसले, यांनी दिलेल्या त्रासाला कंटाळूनच आत्महत्या केल्याचा मजकूर चिठ्ठीत असल्याचे फिर्यादीत म्हटले असून सदर फिर्यादीवरून सून, व्याही, पुतण्या आणि मामा यांच्याविरूद्ध राहुरी पोलिसात गुन्हा दाखल करण्यात आला आहे.
