सोमवार १६ डिसेंबर – नागपूर
पंतप्रधान नरेंद्र मोदींनी संसदेत काँग्रेसवर हल्लाबोल करताना घराणेशाही मोडून काढण्याचा संकल्प केला होता. दुसरीकडे राज्यात काँग्रेसची वाताहात करणाऱ्या महायुतीने आपल्या मंत्रिमंडळावर घराणेशाहीचा ठसा उमटविला असल्याचे दिसत आहे. ३९ मंत्र्यांच्या यादीत बहुतांश मंत्री घराणेशाहीतून आले असल्याचे दिसते.
रविवारी नागपूरमधील राजभवनात पार पडलेल्या सोहळ्यात ३९ आमदारांना मंत्रिपदाची शपथ देण्यात आली. मुख्यमंत्री, उपमुख्यमंत्र्यांसह ही संख्या ४२ वर गेली आहे. मुख्यमंत्री देवेंद्र फडणवीस, उपमुख्यमंत्री अजित पवार, उपमुख्यमंत्री एकनाथ शिंदे यांनी आपल्या सरकारमध्ये चेहऱ्यांना संधी दिली असली तरी मंत्रिमंडळात या मंत्रिमंडळात आपल्याच पंतप्रधान मोदींच्या संकल्पाला तडा देत मंत्रिमंडळात घराणेशाहीतील मंत्र्यांची वर्णी लावली आहे.
नुकत्याच झालेल्या विधानसभा निवडणुकीत महायुतीला मोठे बहुमत मिळूनदेखील मंत्रिमंडळ निवडले जात नव्हते. अखेरीस हिवाळी अधिवेशनाच्या पूर्वसंध्येला निवडणूक निकालाच्या २१ दिवसानंतर मंत्रिमंडळाला मुहूर्त लागला. राजभवनात पार पडलेल्या शपथविधी सोहळ्यात महायुतीच्या मंत्र्यांनी मंत्री पदाची शपथ घेतली. नव्या मंत्र्यांना अद्याप भारतीय वाटप करण्यात आले नसले तरी बिन खात्यांच्या मंत्र्यांच्या उपस्थितीत सोमवारी हिवाळी अधिवेशनाला प्रारंभ होत आहे.
मुख्यमंत्री देवेंद्र फडणवीस यांच्या नेतृत्वातील महायुतीच्या या मंत्रिमंडळातील समीकरणावर चर्चा होत असताना दुसरीकडे घराणेशाहीचा ठसा दिसू लागला आहे. मुख्यमंत्री देवेंद्र फडणवीस, उपमुख्यमंत्री अजित पवार यांच्यासह मंत्रिमंडळातील अनेक मंत्री घराणेशाहीतून आले आहे. मंत्रिमंडळातील मंत्र्यांचे वडील, काका हे राजकारणातील दिग्गज व्यक्तीमत्त्व राहिले आहेत. त्यांच्यानंतर त्यांचा राजकीय वारसा त्यांची मुले पुढे घेऊन जात आहेत. 
मंत्रिमंडळात समावेश करण्यात आलेले इंद्रनील नाईक हे राष्ट्रवादी काँग्रेसचे ज्येष्ठ नेते मनोहर नाईक यांचे चिरंजीव आणि माजी मुख्यमंत्री सुधाकरराव नाईक यांचे पुतणे आहेत. मेघना बोर्डीकर या माजी आमदार रामप्रसाद बोर्डीकर यांच्या कन्या आहेत. आकाश फुंडकर हे भाजपच्या सुरुवातीच्या काळातील ज्येष्ठ नेते दिवगंत नेते पांडुरंग फुंडकर यांचे पुत्र आहेत. योगेश कदम हे शिवसेना शिंदे गटाचे नेते रामदास कदम यांचे पुत्र आहेत. नितेश राणे हे शिवसेना-काँग्रेस असा राजकीय प्रवास केलेले भाजपचे ज्येष्ठ नेते, माजी केंद्रीय मंत्री नारायण राणे यांचे पुत्र आहे.
याशिवाय अभयसिंहराजे यांचे पुत्र शिवेंद्रसिंह, शिवाजीराव देसाई यांचे पुत्र शंभूराजे देसाई, मोरेश्वर सावे यांचे पुत्र अतुल सावे, बाळासाहेब विखे-पाटील यांचे पुत्र राधाकृष्ण विखे-पाटील, भाजपचे दिवंगत नेते गोपीनाथ मुंडे यांची कन्या पंकजा मुंडे-पालवे आणि पुतण्या धनंजय मुंडे यांनीदेखील मंत्रिपदाची शपथ घेतली.
तर जनसंघाचे दिवगंत नेते गंगाधर फडणवीस यांचे पुत्र आणि माजी मंत्री शोभाताई फडणवीस यांचे पुतणे देवेंद्र फडणवीस हे राज्याचे मुख्यमंत्री आहे. उपमुख्यमंत्री अजित पवार हे ज्येष्ठ नेते शरद पवार यांचे पुतणे आहेत. 
