संगमनेरमध्ये १७ ते २० सप्टेंबरदरम्यान अमृत उद्योग समूहातील सहकारी संस्थांच्या वार्षिक सर्वसाधारण सभा; माजी मंत्री बाळासाहेब थोरात, माजी आमदार डॉ. सुधीर तांबे यांची मुख्य उपस्थिती

Annant Ppangarkar

महाराष्ट्र संवाद न्यूज ऑनलाईन –

सहकार क्षेत्रातील उत्कृष्ट कामगिरीमुळे देशात आदर्श मॉडेल ठरलेल्या संगमनेर येथील अमृत उद्योग समूहातील विविध प्रमुख सहकारी संस्थांच्या वार्षिक सर्वसाधारण सभा गुरुवार, १७ सप्टेंबर ते रविवार, २० सप्टेंबर २०२६ या कालावधीत आयोजित करण्यात आल्या आहेत. काँग्रेस वर्किंग कमिटीचे सदस्य, माजी मंत्री लोकनेते बाळासाहेब थोरात आणि माजी आमदार डॉ. सुधीर तांबे यांच्या प्रमुख उपस्थितीत या सभा होणार आहे.

थोर स्वातंत्र्यसेनानी सहकारमहर्षी भाऊसाहेब थोरात यांच्या विचारांवर आधारित या संस्थांनी तालुक्याच्या ग्रामीण विकासासह शेतकरी, दूध उत्पादक, कामगार आणि व्यापाऱ्यांना बळ देऊन स्थानिक अर्थव्यवस्था भक्कम केली आहे.

यंदाच्या सर्वसाधारण सभांच्या मालिकेत १७ सप्टेंबर रोजी सकाळी ११ वाजता सह्याद्री शाळेजवळील जिल्हा बँक शाखा परिसरात चेअरमन संपतराव डोंगरे यांच्या अध्यक्षतेखाली संगमनेर सहकारी शेतकी संघाची सभा होईल. याच दिवशी दुपारी १ वाजता चेअरमन रणजीतसिंह देशमुख यांच्या अध्यक्षतेखाली कारखान्याच्या अमृतेश्वर मंदिर प्रांगणात राजहंस दूध संघाची वार्षिक सभा होणार आहे.

शुक्रवार, १८ सप्टेंबर रोजी दुपारी १ वाजता अमृतेश्वर मंदिरासमोरील प्रांगणात सहकारमहर्षी भाऊसाहेब थोरात सहकारी साखर कारखान्याची ५९ वी वार्षिक सर्वसाधारण सभा कारखान्याचे चेअरमन लोकनेते बाळासाहेब थोरात यांच्या अध्यक्षतेखाली पार पडेल. त्यानंतर शनिवारी सकाळी ११ वाजता वडगाव पान येथील उपबाजार संकुलात सभापती शंकरराव खेमनर यांच्या अध्यक्षतेखाली कृषी उत्पन्न बाजार समितीची सभा निश्चित करण्यात आली आहे.

रविवारी, २० सप्टेंबर रोजी सभांचा समारोप होणार असून सकाळी १० वाजता अमृतवाहिनी बँकेच्या सभागृहात राजेंद्र कडलग यांच्या अध्यक्षतेखाली गरुड कुक्कुटपालन संस्थेची, तर १०.३० वाजता राजेंद्र गुंजाळ यांच्या अध्यक्षतेखाली हरिश्चंद्र फेडरेशन पाणीपुरवठा संस्थेची सभा होईल. दुपारी १ वाजता अमृतेश्वर मंदिर प्रांगणात चेअरमन सुधाकर जोशी यांच्या अध्यक्षतेखाली सहकारमहर्षी भाऊसाहेब थोरात अमृतवाहिनी सहकारी बँकेची वार्षिक सभा पार पडणार आहे.

या सर्व सभांना आमदार सत्यजित तांबे, युवक काँग्रेसच्या अध्यक्ष डॉ. जयश्रीताई थोरात, माधवराव कानवडे, बाजीराव खेमनर, दुर्गाताई तांबे, इंद्रजीत थोरात यांच्यासह अमृत उद्योग समूहातील विविध संस्थांचे पदाधिकारी उपस्थित राहणार आहेत.

या सर्व सभांना सभासद, शेतकरी व उत्पादकांनी मोठ्या संख्येने उपस्थित राहावे, असे आवाहन संबंधित संस्थांच्या पदाधिकारी, संचालक मंडळाने केले आहे.