मंगळवार १७ डिसेंबर | अनंत पांगारकर
संगमनेर – संगमनेर शहरात वाढत्या गुन्हेगारी घटनांमुळे कायदा व सुव्यवस्था ढासळत असल्याचे सातत्याने समोर येत आहे. दोन तासाच्या अंतरात संगमनेर बस स्थानकावर दोन प्रवासी महिलांच्या जवळील दीडशे ग्रॅम पेक्षा अधिक वजनाचे सोन्याचे दागिने आणि रोकड रक्कम अज्ञात चोरट्याने चोरून नेल्याचा प्रकार सोमवारी संध्याकाळी समोर आला आहे. 
संगमनेर शहर पोलीस ठाण्यात या संदर्भात लता शरद घुगे (रा. सायखेडा, निफाड) व शुभांगी रवींद्र कासार (रा. खराडी, पुणे) या दोन्ही महिलांनी दिलेल्या तक्रारीवरून दागिने चोरीचे स्वतंत्र दोन गुन्हे भारतीय न्याय संहिता कलम ३०३(२) नुसार नोंदविण्यात आले आहेत.
संगमनेर शहरातील दागिने चोरीच्या घटना लक्षात घेता अहिल्यानगर जिल्ह्याचे पोलीस अधीक्षक राकेश ओला यांनी अहिल्यानगरच्या स्थानिक गुन्हे शाखेला या संदर्भात समांतर तपास करण्याचे आदेश दिले होते. त्यानंतर स्थानिक गुन्हे शाखेच्या पथकाने एका टोळीचा माग काढत आरोपींना पकडले होते. या आरोपींकडून संगमनेर शहरातील तब्बल आठ आणि लोणी येथील एका गुन्ह्याचा उलगडा करण्यात पोलिसांना यश आले होते. गुन्हे शाखेने हे आरोपी संगमनेर पोलिसांच्या ताब्यात दिल्यानंतर पुढे काय घडले या संदर्भात कोणतीही माहिती उपलब्ध होऊ शकली नाही.
दरम्यान शहरातील दागिने चोरीची ही मालिका अद्यापही कायम असल्याचे समोर आले असून सोमवारी दुपारी दोन वाजता सायखेडा (निफाड) येथील महिला संगमनेर बस स्थानकावर नासिककडे जाणाऱ्या बसमध्ये चढत असताना या महिलेच्या पर्समध्ये असलेले ७८ ग्रॅम वजनाचे सोन्याचे दागिने दोन हजार रुपये किमतीच्या चांदीच्या बांगड्या आणि दोन हजार रुपयांची रोकड अज्ञात चोराने लंपास केली.
यामध्ये ३५ ग्रॅम वजनाचे सोन्याचे गंठण, ३६ ग्रॅम वजनाची सोन्याची मोहनमाळ, एक ग्रॅम वजनाचे सोन्याचे तीन ओम पान, एक ग्रॅम वजनाची सोन्याची रिंग, दोन ग्रॅम वजनाची नथ आणि तीन ग्रॅम वजनाचे मनी याचा समावेश आहे. या संदर्भात लता शरद घुगे (रा. सायखेडा, निफाड) यांनी दिलेल्या फिर्यादीवरून अज्ञात चोरट्याविरुद्ध गुन्हा दाखल करण्यात आला आहे.
ही घटना घडून दोन तासांचा अवधी होत नाही तोच दुपारी पुन्हा सव्वाचार वाजण्याच्या सुमारास पुण्याकडे जाणाऱ्या बसमध्ये चढत असताना खराडी (पुणे) येथील महिलेच्या पर्स मधून ८५ ग्रॅम वजनाचे सोन्याचे दागिने अज्ञात चोरट्याने चोरून नेण्याची घटना समोर आली.
पर्स मधून चोरी गेलेल्या दागिन्यांमध्ये ७५ ग्रॅम वजनाचे सोन्याचे गंठण पोत, पाच ग्रॅमचे सोन्याचे पेंडल आणि पाच ग्रॅम वजनाचे सोन्याचे नथ याच्यासह तीन हजार रुपयांच्या रोकड रकमेचा समावेश आहे.
चोरीच्या दोन्ही घटनांचा तपास पोलीस निरीक्षक रवींद्र देशमुख यांच्या मार्गदर्शनाखाली अनुक्रमे पोलीस नाईक कार्तिकी जाधव आणि पोलीस हेड कॉन्स्टेबल योगेश हासे करत आहे.दोन तासाच्या अंतरात एकाच ठिकाणी घडलेल्या या चोरीच्या घटनांमुळे पोलिसांचा धाक चोरट्यांवर उरला नसल्याचे समोर आले आहे.
