चार अवैध कत्तलखान्यांवर एलसीबीचे छापे, १०५० किलो गोमांसासह ९ जनावरांची सुटका

महाराष्ट्र संवाद न्यूज ऑनलाईन-

अहिल्यानगरच्या स्थानिक गुन्हे शाखेच्या पथकाने राहुरी परिसरात गोवंशीय जनावरांची कत्तल करून मांस विक्री करणाऱ्या चार वेगवेगळ्या ठिकाणी अचानक छापे टाकले. या कारवाईत पोलिसांनी ४ लाख १५ हजार रुपये किमतीचा मुद्देमाल जप्त केला. यामध्ये १०५० किलो गोमांस, कत्तलीसाठी वापरली जाणारी हत्यारे, वजनकाटा आणि कत्तलखान्यातून ९ जिवंत लहान-मोठ्या गोवंशीय जनावरांची सुखरूप सुटका करण्यात आली.

अहिल्यानगर जिल्ह्यातील अवैध धंद्यांवर कठोर कारवाई करण्याचे निर्देश पोलीस अधीक्षक मुम्मका सुदर्शन यांनी दिले होते. या आदेशानुसार स्थानिक गुन्हे शाखेचे पोलीस निरीक्षक संतोष मुटकुळे यांच्या मार्गदर्शनाखाली पोलीस उपनिरीक्षक अनंत सालगुडे, पोलीस अंमलदार गणेश धोत्रे, सुनील पवार, विशाल तनपुरे, अजिनाथ पाखरे आणि अमीरराजा आतार यांच्या पथकाने राहुरी पोलीस ठाण्याच्या हद्दीत ही धडक कारवाई केली.

या छाप्यांच्या प्रकरणी राहुरी पोलीस ठाण्यात एकूण चार स्वतंत्र गुन्हे दाखल करण्यात आले असून पाच आरोपींवर भारतीय न्याय संहिता (BNS) आणि महाराष्ट्र पशुसंरक्षण कायद्याच्या विविध कलमांनुसार गुन्हे नोंदवले आहेत. 

पोलिसांनी कारवाईदरम्यान खाटीक गल्ली येथील मोहिद फकीर शेख (वय ४२) आणि रियाज फकीर शेख (वय ५२) या दोघांना ताब्यात घेतले आहे. तर निसार जब्बार शेख (रा. खाटीक गल्ली), अजिम रज्जाक सय्यद (रा. इस्माईलनगर) आणि अन्सार कुरेशी (रा. इस्माईलनगर) हे तीन आरोपी फरार झाले असून पोलीस सध्या त्यांचा शोध घेत आहेत.