बुधवार १८ डिसेंबर
सिन्नरचे माजी उपनगराध्यक्ष नामदेव लोंढे यांच्या मुलावर हल्ला करण्यात आल्याची घटना बुधवारी दुपारी घडली. हल्लेखोरांनी सागर लोंढे यांच्या पाठीवर, डाव्या हातावर, डोक्यावर कोयत्याने वार केल्याने गंभीर जखमी अवस्थेत त्यांना उपचारासाठी नाशिकला हलविण्यात आले आहे.
दुकानात शिरून हल्ला – सिन्नर-शिर्डी रस्त्यावरील रस्त्यावर वावी वेस जवळील दोस्ती ट्रेडर्स या स्टीलच्या दुकानात आय ट्वेंटी या चार चाकी कारमधून आलेल्या चौघांपैकी तिघांनी दुकानाचे संचालक सागर नामदेव लोंढे (वय २८) यांच्यावर दुकानात शिरून हा हल्ला केला. सागर यांच्यावर कोयत्याने हल्ला केल्याने गंभीर जखमी झाल्याने आसपासच्या नागरिकांनी त्यांना तातडीने रुग्णालयात हलविले.
हल्लेखोर संगमनेरच्या दिशेने – हल्ल्यादरम्यान चार चाकी वाहनात थांबून असलेल्या एकाने हवेत गोळीबार केल्याने आजूबाजूचे लोक तात्काळ आवाजाच्या दिशेने दुकानाकडे पळत आले. दरम्यान हल्लेखोर कारमधून वेगाने संगमनेरच्या दिशेने निघून गेले.
पोलीस घटनास्थळी – दरम्यान, घटनेची माहिती मिळताच पोलीस निरीक्षक संभाजी गायकवाड यांच्यासह त्यांची टीम घटनास्थळी दाखल झाली. दुकानाच्या बाहेर व दुकानाच्या आत असलेला रक्ताचा सडा पाहून पोलिसांनी श्वान पथकाला पाचारण केले. श्वानपथक व ठसे तज्ञ घटनास्थळी पोहोचले आहे.
कार दुभाजकावर आदळली – सिन्नर पोलिसांनी हल्लेखोरांना पकडण्यासाठी नांदूर शिंगोटे पोलिसांशी संपर्क साधला असता नांदूर शिंगोटे पोलिसांनी सिन्नर संगमनेर मार्गावर नाकाबंदी केली. हल्लेखोरांचे वाहन नांदूर शिंगोटे जवळ असलेल्या नाकाबंदीपाशी आले असता पोलिसांची नाकाबंदी बघतात हल्लेखोरांनी आपल्या ताब्यातील कार पुन्हा नाशिकच्या दिशेने वळविण्याचा प्रयत्न केला. मात्र, हल्लेखोर यांचे वाहन दुभाजकावर जाऊन आदळून त्यातच अडकून पडले. त्यामुळे हल्लेखोरांनी रस्त्यावरून जाणाऱ्या एकाची मोटार सायकल घेत तिघे तिच्यावरून निमोणच्या रस्त्याने पसार झाले. यादरम्यान उर्वरित एक जण पळून जाण्यात यशस्वी झाला.
कार तपासणीत आढळला गावठी कट्टा – दरम्यान नांदुर-शिंगोटे येथे दुभाजकावर अडकून पडलेली कार पोलिसांनी ताब्यात घेतली असून तिची तपासणी केले असता त्यात पोलिसांना गावठी कट्टा आढळून आला आहे. तसेच हल्लेखोरांकडील कार चोरीची आहे की मालकीची याची अद्याप माहिती मिळू शकली नाही.
