शनिवार २१ डिसेंबर
संगमनेर – सहकार महर्षी भाऊसाहेब थोरात सहकारी साखर कारखान्याकडून २०२४-२५ या वर्षाच्या गळीत हंगामासाठी कार्यक्षेत्रातील ऊसाला प्रति टन २८०० रुपये व २०० रुपये उसविकास अनुदान याप्रमाणे प्रति टनामागे तीन हजार रुपयांचा भाव देण्यात येणार असल्याची माहिती कारखान्याचे अध्यक्ष बाबा ओहोळ यांनी दिली आहे.
सहकार महर्षी भाऊसाहेब थोरात यांच्या आदर्श तत्वावर वाटचाल करणाऱ्या व काँग्रेसचे ज्येष्ठ नेते माजी मंत्री बाळासाहेब थोरात यांच्या मार्गदर्शनाखाली कार्यरत असलेल्या सहकार महर्षी भाऊसाहेब थोरात सहकारी साखर कारखान्याने ऊस उत्पादक शेतकरी आणि सभासदांचे हीत सातत्याने जोपासले आहे. सातत्याने सर्वाधिक भाव देण्याचा प्रयत्न केला. त्यामुळे कार्यक्षेत्रासह कार्यक्षेत्र बाहेरील ऊस उत्पादक शेतकऱ्यांनी कारखान्यावर मोठा विश्वास दर्शविला आहे. काटकसर, पारदर्शकता आणि आधुनिकीकरण या तत्त्वांचा वापर केल्याने राज्य व राष्ट्रीय पातळीवर कारखान्याला अनेक पुरस्कार मिळाले आहेत.
यावर्षी सर्वत्र चांगला पाऊस झाला असून निळवंडे धरणाचे जनक बाळासाहेब थोरात यांच्या प्रयत्नातून डावा व उजवा कालवा ही पूर्ण झाला आहे. वितरिकांच्या कामासाठीही थोरात हे सातत्याने पाठपुरावा करत आहेत. पाण्याच्या मुबलकतेमुळे आगामी वर्षांमध्ये कार्यक्षेत्रात ऊस लागवड वाढणार आहे.
कार्यक्षेत्राबाहेरील ऊसाला २८०० रुपये भाव – थोरात यांच्या मार्गदर्शनाखाली या गळीत हंगामासाठी येणाऱ्या ऊसास २०० रुपयाप्रमाणे ऊस विकास अनुदान देण्याचा निर्णय संचालक मंडळाने घेतला. त्यामुळे कार्यक्षेत्रातील ऊसास प्रति टन २८०० रुपये आणि ऊस विकास अनुदान २०० रुपये असा तीन हजार रुपये प्रति टन ॲडव्हान्स भाव ऊस उत्पादक शेतकऱ्यांना मिळणार आहे. तर कार्यक्षेत्राबाहेरी ऊसास मात्र २८०० रुपये प्रति टन भाव मिळणार आहे.
१० लाख मेट्रिक टनापेक्षा जास्त ऊस गाळपाचे नियोजन…
माजी मंत्री बाळासाहेब थोरात यांच्या मार्गदर्शनाखाली कारखान्याने कायम शेतकरी ऊस उत्पादक कामगार यांचे हित जोपासले असून तालुक्याची ग्रामीण अर्थव्यवस्था मजबूत केली आहे. यावर्षीही १० लाख मेट्रिक टनापेक्षा जास्त ऊस गाळप करण्याचे नियोजन करण्यात आले आहे. – जगन्नाथ घुगरकर, कार्यकारी संचालक, सहकार महर्षी थोरात कारखाना.
