बुधवार, २५ डिसेंबर
संगमनेर – संगमनेरचे तहसीलदार धीरज मांजरे यांच्या आदेशावरून महसूलच्या पथकाने केलेल्या कारवाईत वाळू वाहतूक करणारी विना क्रमांकाची पिकअप वाळूसह पकडली असून विनापरवाना बेकायदा वाळू वाहतूक करणाऱ्या अमोल संजय जोंधळे (रा. गोल्डन सिटी, संगमनेर) याच्याविरुद्ध शहर पोलीस ठाण्यात गुन्हा दाखल करण्यात आला आहे.
संगमनेरचे तहसीलदार धीरज मांजरे यांना शहरातून मोठ्या प्रमाणात बेकायदा वाळू वाहतूक होत असल्याची माहिती मिळाली होती. मांजरे यांनी तात्काळ आपल्या महसूलच्या अधिकाऱ्यांना गेल्या बुधवारी शहर व आसपासच्या परिसरात शोध घेऊन कारवाई करण्याचे आदेश दिले होते.
ग्राम महसूल अधिकारी संतोष जाधव, मच्छिंद्र तात्याबा राहणे आदींनी तहसीलदारांच्या आदेशावरून शहर व परिसरात विनापरवाना वाळू वाहतूक करणाऱ्यांचा शोध सुरू केला असता त्यांना कासारा दुमाला गावच्या हद्दीत पुणे नाशिक महामार्गाच्या पूर्व बाजूस असलेल्या सर्विस रोडला एका विना क्रमांकाच्या पांढऱ्या रंगाच्या पिकअप मधून वाळू वाहतूक होत असल्याचे आढळून आले. पथकाने पिकअप चालकाला थांबवून त्याच्याकडे वाळू वाहतुकीबाबत शासकीय परवाना असल्या संदर्भात विचारपूस केली असता त्याच्याकडे परवाना आढळून आला नाही तसेच पिकअप मालक तोच असल्याचे अमोल जोंधळे यांनी सांगितले.
पथकाने वाळूने भरलेली पिकअप ताब्यात घेत तिची पाहणी केली असता त्यात पाच हजार रुपये किमतीचे अर्धा ब्रास वाळू आढळून आली. पथकाने पंचनामा करत पिकअपसह दोन लाख पाच हजार रुपयांचा मुद्देमाल ताब्यात घेत तहसील कचेरीत आणला.
या संदर्भात मच्छिंद्र तात्याबा रहाणे (वय ४८ वर्षे धंदा – नोकरी रा. चंदनापुरी ता संगमनेर जि अहिल्यानगर) यांनी दिलेल्या फिर्यादीवरून आर्थीक फायद्याकरीता नदी पात्रातुन विनापरवाना बेकायदा वाळुची चोरी करून वाहतुक करताना मिळून आलेल्या विना क्रमांकाच्या पांढऱ्या रंगाच्या महिंद्रा कंपनीच्या पिकअप चालक-मालक अमोल संजय जोंधळे (रा. गोल्डन सिटी, संगमनेर, ता. संगमनेर जि. अहिल्यानगर) याच्याविरुद्ध संगमनेर शहर पोलीस ठाण्यात भारतीय न्याय संहीता २०२३ चे क ३०३(२) सह पर्यावरण संरक्षण कायदा कलम ३/१५ प्रमाणे गुन्हा दाखल करण्यात आला असून संगमनेर पोलीस पुढील तपास करत आहे.
