गुरुवार, २६ डिसेंबर
मुंबई – राज्याचे मुख्यमंत्री व गृहमंत्री असलेल्या देवेंद्र फडणवीस यांची समाज माध्यमातून पोस्ट व व्हिडिओ पोस्टच्या माध्यमातून बदनामी करणाऱ्या १२ प्रोफाइल विरोधात राज्याच्या सायबर विभागाकडून गुन्हा दाखल करण्यात आला आहे. 
सोशल मीडिया संदर्भात गंभीर पावलं – सोशल मीडिया संदर्भात सरकारने उचलली गंभीर पावलं – समाज माध्यमाचा चुकीच्या पद्धतीने होत असलेला वापर लक्षात घेत राज्य सरकारने आता सायबर गुन्ह्यांसंदर्भात गंभीर पावले टाकण्यास सुरुवात केली आहे. नव्या सरकारमध्ये मुख्यमंत्रीपदाबरोबरच गृहमंत्रीपद देवेंद्र फडणवीस यांच्याकडे आहे.
काय आहे प्रकार – मुख्यमंत्री देवेंद्र फडणवीस यांच्या जुन्या भाषणांमध्ये छेडछाड करून ती समाज माध्यमात पोस्ट करण्यात आली आहे. याप्रकरणी भाजपच्यावतीने पोलिसांकडे तक्रार करण्यात आली होती. या तक्रारीची दखल घेत समाज माध्यमांवरील संशयित प्रोफाइल वापरकर्त्यांविरुद्ध गुन्हा दाखल करून त्यांना नोटीस बजावण्यात आली आहे.
यांच्या विरोधात गुन्हा – ट्विटर (नवीन एक्स), इंस्टाग्राम व युट्युब वरील १२ प्रोफाइल विरोधात हा गुन्हा दाखल करण्यात आल्याची माहिती देण्यात आली असून यात भारत शिंदे, शुद्धोधन सहजराव, नागपूर काँग्रेस सेवा दल, सौरभ सिंह चव्हाण, मुकेश लवले, सुरेश काळे, प्रसाद साळवी, विष्णू भोतकर, वरद कनकी, अमोल कांबळे, सय्यद सलीम व द स्मार्ट २३० यांच्या विरोधात गुन्हा दाखल करण्यात आला आहे.
भारतीय न्याय संहितेच्या या कलमांतर्गत गुन्हा – मुख्यमंत्र्यांची बदनामी करण्याच्या उद्देशाने जाणीवपूर्वक समाज माध्यमात चित्रफिती अपलोड केल्याच्या आरोपावरून महाराष्ट्र सायबर पोलिसांनी भारतीय न्याय संहिता कलम ३५३(१), ३५६(२), १९२, ३(५) व माहिती तंत्रज्ञान प्रतिबंधक कायदा कलम ६७ अन्वये हा गुन्हा दाखल केला आहे.
