गुरुवार, २६ डिसेंबर
एका १३ वर्षाच्या अल्पवयीन मुलीवर लैंगिक अत्याचार करून तिची हत्या केल्याप्रकरणी पोलिसांनी मुख्य आरोपी असलेल्या पती-पत्नीला अटक केली आहे. अटक केलेल्या पती-पत्नीला कल्याणच्या न्यायालयाने सात दिवसांची पोलीस कोठडी सुनावली आहे.
कल्याण पूर्व येथे ही घटना घडली. विशाल गवळी असे यातील मुख्य आरोपीचे नाव असून त्याला बुलढाणा येथून अटक करण्यात आली. तर पतीच्या दुष्कृत्यावर पडदा टाकत पत्नीने मुलीच्या मृतदेहाची विल्हेवाट लावण्यास मदत केल्याची माहिती पोलिसांनी दिली. दरम्यान, याप्रकरणी कल्याण पूर्व येथील नागरिकांनी माजी नगरसेवक महेश गायकवाड यांच्या नेतृत्त्वाखाली निषेध मोर्चा काढत विशाल गवळीला फाशीची शिक्षा द्यावी, अशी मागणी केली.
कल्याण पूर्व येथील एका अल्पवयीन मुलीचे २३ तारखेला संध्याकाळी अपहरण झाले होते. आईकडून २० रुपये घेऊन ही अल्पवयीन मुलगी खाऊ आणण्यासाठी दुकानात गेली होती. मात्र, ती परत न आल्याने कुटुंबियांनी मुलीचा शोध सुरू केला. बराच कालावधी उलटूनही मुलगी परत न आल्याने मुलीच्या वडिलांनी मुलगी बेपत्ता असल्याची तक्रार कोळसेवाडी पोलीस ठाण्यात केली.
दुसऱ्या दिवशी २४ डिसेंबरला मुलीचा मृतदेह कल्याणनजीक बापगाव परिसरात सापडला. याप्रकरणी पोलिसांनी गुन्हा दाखल करून आरोपींचा शोध घेण्यासाठी तपास पथके तयार केली होती. प्राथमिक तपासणीत या अल्पवयीन मुलीवर लैंगिक अत्याचार करून तिची हत्या करण्यात आल्याचे निष्पन्न झाले. यानंतर पोलिसांनी अवघ्या काही तासात या प्रकरणातील दोन आरोपींची ओळख पटवली. त्याच परिसरात राहणारा विशाल गवळी आणि त्याची पत्नी या प्रकरणातील मुख्य आरोपी असल्याचे पोलिसांनी सांगितले.
विशाल गवळीविरोधात याआधीदेखील चार विनयभंगाचे गुन्हे कोळसेवाडी पोलीस ठाण्यात दाखल आहेत. त्याने आतापर्यंत तीन लग्ने केली असून, सध्या तो तिसऱ्या बायकोबरोबर राहतो. पतीच्या दुष्कृत्यावर पडदा टाकत त्याच्या तिसऱ्या पत्नीने मुलीच्या मृतदेहाची विल्हेवाट लावण्यासाठी त्याला मदत केल्याचे पोलिसांनी सांगितले.
पोलिसांनी सीसीटीव्ही फुटेजच्या मदतीने विशाल गवळीचा शोध सुरू करत त्याला बुलढाणा येथील शेगाव येथून अटक केली. तसेच पोलिसांनी या प्रकरणात मृतदेहाची विल्हेवाट लावण्यासाठी वापरलेली रिक्षादेखील ताब्यात घेतली आहे. या रिक्षाचालकाचा गुन्ह्यात किती सहभाग आहे, याबाबत चौकशी सुरू असल्याचे पोलीस उपायुक्त अतुल झेंडे यांनी सांगितले.
अशी घडली घटना – विशालने सायंकाळी पाच वाजता अल्पवयीन मुलीला फूस लावून घरात घेतले व मुलीसोबत गैरकृत्य करून तिची हत्या केली. त्यानंतर एका मोठ्या बॅगेमध्ये त्याने मुलीचा मृतदेह भरून ठेवला. सायंकाळी सात वाजता पत्नी घरी आली, तेव्हा घडलेला प्रकार त्याने पत्नीला सांगितला. पतीने केलेले कृत्य ऐकून पत्नीला धक्का बसला. नंतर दोघांनी पुरावे नष्ट करण्यासाठी आधी घरातले रक्त पुसले. त्यानंतर मृतदेहाची विल्हेवाट कशी लावायची याची योजना आखली. रात्री साडेआठ वाजता विशालने मित्राची रिक्षा बोलावून घेतली व दोघेही मृतदेह घेऊन नऊ वाजता बापगावच्या दिशेने रवाना झाले. मृतदेह फेकून दोघे परतले, परतत असताना विशालने आधारवाडी चौकातून दारू विकत घेतली आणि तेथून आपल्या पत्नीच्या माहेरी बुलढाणा येथे तो निघून गेला. मात्र, घराजवळ सापडलेल्या रक्तामुळे विशालनेच हे कृत्य केल्याचा संशय पोलिसांना आला. त्यानंतर सीसीटीव्ही फुटेजच्या सहाय्याने पोलिसांनी या प्रकरणाचा उलगडा केला.
