शुक्रवार, २७ डिसेंबर
सराईत गुन्हेगाराने आपल्या साथीदारांच्या मदतीने एकावर खुनी हल्ला केला मात्र, राजकीय बड्या नेत्याने पोलिसांवर दबाव टाकल्याने या गुन्ह्यातून सराईत आरोपीचे नाव वगळण्यात आले. सराईत आरोपीचे नाव वगळणे संबंधित पोलीस उपनिरीक्षकाला चांगलेच महागात पडले आहे. या प्रकाराची माहिती मिळतात पोलीस आयुक्त विनयकुमार चौबे यांनी संबंधित आरोपीला तात्काळ बेड्या ठोकण्याची आदेश देत पोलीस उपनिरीक्षकाचे तडकाफडकी निलंबन केले आहे.
रविवारी (२२ डिसेंबर) काळेवाडी येथे दोन गटात हाणामारी झाली यामध्ये आरोपींकडून एका व्यक्तीवर खुनी हल्ला करण्यात आला होता. एका सराईत गुन्हेगाराने आपल्या साथीदारांच्या मदतीने हा हल्ला केला. त्यानंतर एका बड्या राजकीय नेत्याने पोलिसांवर दबाव टाकत या सराईत गुन्हेगाराचे नाव आरोपीच्या यादीतून वगळण्यास पोलिसांना भाग पाडले.
राजकीय दबावाला बळी पडत पोलीस उपनिरीक्षक सचिन चव्हाण यांनी आरोपी प्रशांत दिघे (पिंपरी-चिंचवड) याचे नाव गुन्ह्यातून वगळले असल्याची माहिती पोलीस आयुक्त विनय कुमार चौबे यांना समजली. त्यांनी तातडीने कारवाई करत चव्हाण यांचे निलंबन केले. तर आरोपीला अटक करण्याचे आदेश दिले.
आरोपी प्रशांत दिघे याच्या विरोधात खून, खुनाचा प्रयत्न, हत्यार बंदी, जबरी चोरी आदी गंभीर स्वरूपाचे १९ गुन्हे दाखल आहेत. रविवारच्या घटनेत त्याचा सहभाग असून देखील आरोपीच्या यादीतून त्याचे नाव राजकीय दबावामुळे वगळण्यात आले होते.
दरम्यान संबंधित लोकप्रतिनिधीने पोलीस प्रशासनावर पक्षपातीपणाचा आरोप केला आहे. तसेच पोलीस हप्ता वसुली करत असल्याचे जाहीररित्या सांगितले. मात्र वरिष्ठ पोलीस अधिकाऱ्यांनी राजकीय दबाव झुगारल्याने आरोप होत असल्याचे म्हटले असल्याची माहिती समोर आली.
