शुक्रवार, २७ डिसेंबर
दुसऱ्या मजल्यावरील घरात गळफास घेत माय-लेकीने आत्महत्या केल्याचा प्रकार समोर आला आहे. आपल्या नववर्षाच्या मुलीसह आईने आत्महत्या केल्याने परिसरात खळबळ उडाली आहे. मायलेकीच्या मृतदेहाजवळ पोलिसांना एका वहीमध्ये सुसाईड नोट आढळून आली आहे.
सपना माळी (वय- ३३) व केतकी माळी (वय- ९) असे आत्महत्या करणाऱ्या माय लेकीचे नाव आहे. ही घटना गुरुवारी (२६ डिसेंबर) दुपारी तीनच्या सुमारास जळगाव जिल्ह्यातील एरंडोलमधील जहांगीरपुरा परिसरामध्ये घडली आहे.
मिळालेल्या माहितीनुसार, सपना माळी यांचा आठ वर्षापुर्वी पतीसोबत घटस्फोट झाला होता. घटस्फोटानंतर त्या आपल्या माहेरी मुलीसह एरंडोलमधील महादेव मंदिर परिसरात राहत होत्या.
दरम्यान, गुरुवारी दुपारच्या वेळी सपना यांचा भाऊ घरी आल्यानंतर त्याला दोघी माय-लेकींनी गळफास घेतल्याचे दिसून आले. याबाबत पोलिसांना माहिती मिळताच त्यांनी घटनास्थळी धाव घेत तपास केला तेव्हा पोलिसांच्या हाती एक सुसाईड नोट सापडली.
पोलिसांना मिळालेल्या सुसाईड नोटमध्ये आमच्या आत्महत्येस कोणीही जबाबदार नसल्याचे नमूद केल्याचे दिसून आले. दरम्यान, आत्महत्यामागे मानसिक तणाव असल्याचा अंदाज पोलिसांनी वर्तवला आहे. या संदर्भात एरंडोल पोलीस ठाण्यात अकस्मात मृत्यूची नोंद करण्यात आली आहे.
