गुरुवार, ०२ जानेवारी
संगमनेर – संगमनेर मधील कवी अनंत फांदी नाट्यगृह बंदिस्त करण्याच्या प्रक्रियेला वेग आला असून नव्या वर्षात हे नाट्यगृह शहराच्या वैभवात भर घालेल, असा विश्वास संगमनेर नगर परिषदेचे प्रशासक तथा मुख्याधिकारी रामदास कोकरे यांनी व्यक्त केला आहे.
नाट्यगृह बंदिस्त करण्याचे काम सुरू असून या संदर्भात रंगभूमीशी निगडित नाट्यकर्मीं व संगमनेरकरांच्या सूचना विचारात घेता याव्या, यासाठी संगमनेर नाट्य परिषदेच्यावतीने कोकरे यांना निवेदन देण्यात आले होते. नाट्यकर्मींच्या या निवेदनाला प्रतिसाद देत मुख्याधिकारी कोकरे यांनी मंगळवारी सकाळी नाट्यगृहामध्ये अधिकारी, वास्तु विशारद आणि उपस्थित कलाकार यांच्याशी संवाद साधला. 
वास्तुविशारद अरविंद वैद्य यांनी उपस्थित रंगकर्मींना नियोजित नाट्यगृहाच्या नूतनीकरणाच्या सुरू असलेल्या प्रक्रियेबाबत माहिती दिली. त्याबरोबरच प्रत्यक्ष पाहणीमध्ये अनेक महत्वाच्या मुद्द्यावर प्रश्नांवर चर्चा झाली आणि सदर बाबी कामामध्ये अंतर्भूत करण्यात येतील. सदर काम सुरू असून सध्या त्याबाबत काही सूचना करायच्या असतील तर त्या स्वागतार्ह असतील असे सांगितले. एकंदरीत प्रशासनाची भूमिका ही सर्वसमावेशक सूचना अंतर्भूत करून एक सुसज्ज नाट्यगृह संगमनेर येथे चालू वर्षात पूर्णत्वास नेण्यासाठी अत्यंत सकारात्मक आहे.
नाट्यगृहात आवश्यक ऊर्जेसाठी सौर ऊर्जेच्या पर्यायावरदेखील चर्चा करण्यात आली. नाट्यगृहाच्या नूतनीकरणाबाबत वेळोवेळी आलेल्या योग्य सूचनांचा अंतर्भाव केला जाईल. याबाबत प्रशासनाच्यावतीने कोकरे यांनी उपस्थित त्यांना खात्री दिली. तसेच आपल्या मुख्याधिकारी पदाच्या वेंगुर्ले येथील कार्यकाळातील नाट्यगृह बांधणीचा अनुभव यावेळी त्यांनी उपस्थितांना सांगितला.
मुख्याधिकारी आणि नाट्यकर्मी यांच्यात झालेल्या चर्चेत ज्येष्ठ रंगकर्मी शांती फाऊंडेशनचे डॉ. सोमनाथ मुटकुळे, संग्राम संस्थेचे सूर्यकांत शिंदे, रंगकर्मी प्रतिष्ठानचे अंतुन घोडके, नाटकवाले संस्थेचे डॉ. अमित शिंदे, संगमनेर साहित्य परिषदेचे अरविंद गाडेकर, अनिल सोमनी, संगीत क्षेत्रातील सत्यजित सराफ, शालेय-महाविद्यालयीन रंगभूमीशी निगडित सौरभ म्हाळस, सुभाष कानडे, परिषदेचे कार्यवाह विशाल कदम यांनी भाग घेत महत्त्वपूर्ण सूचना केल्या. मुख्याधिकाऱ्यांच्या वेंगुर्ले येथील नाट्यगृह बांधणीच्या कामाचा अनुभव या कामात देखील उपयोगात येईल अशी अशा व्यक्त करत अखिल भारतीय मराठी नाट्य परिषदेचे नियामक मंडळ सदस्य व संगमनेर नाट्य परिषदेचे अध्यक्ष डॉ. संजय कुमार दळवी यांनी आभार मानले.
