शुक्रवार ३ जानेवारी
संगमनेर – नाशिक पदवीधर मतदारसंघाचे आमदार सत्यजित तांबे यांनी शुक्रवारी पत्नी डॉ. मैथिली यांच्यासह स्वामी समर्थ सेवा केंद्रात जात आरती करत जनतेच्या सुख समृद्धी आणि निरामय आरोग्यासाठी प्रार्थना केली. या आरती मागील कारण स्वतः तांबे यांनी समाज माध्यमावर सांगितले आहे.
आमदार तांबे म्हणाले, संगमनेर शहरातील श्री स्वामी समर्थ सेवा केंद्रात गुरुपौर्णिमेला आलो असताना या केंद्राच्या आवारात वीज वितरण कंपनीची डीपी आहे आणि या डीपीतून सातत्याने शॉर्ट सर्किट होत असल्याने केंद्रात येणारे सेवेकरी भयभीत आहेत, ही बाब निदर्शनास आली. याबाबत तातडीने वीज वितरण कंपनीच्या अधिकाऱ्यांना सूचना देऊन तिथली डीपी हलवली.
याबाबत कृतज्ञता व्यक्त करण्यासाठी सर्व स्वामी सेवेकऱ्यांनी, केंद्राच्या व्यवस्थापकांनी नवीन वर्षाच्या पहिल्या गुरुवारी आरतीचा मान मला दिला. हे सौभाग्य मला दिल्याबद्दल सर्वांचे आभार व्यक्त करत स्वामींचा सेवेकरी म्हणून इतर सेवेकऱ्यांचा भक्तिमार्ग सुकर करणे, हे माझे कर्तव्य आहे अशी भावना व्यक्त केली.
नवीन वर्षामध्ये संगमनेरमधील सर्व नागरिक बंधू भगिनींना चांगले आरोग्य व समृद्धी मिळावी याचबरोबर प्रत्येकाच्या जीवनामध्ये आनंद निर्माण व्हावा अशी प्रार्थना ही आमदार सत्यजित तांबे यांनी यावेळी केली. आरतीसाठी संगमनेर शहरातील सर्व सेवेकरी यांच्यासह नागरिक महिला व युवक मोठ्या संख्येने उपस्थित होते.
