खा. श्रीमंत शाहू छत्रपती महाराज व विजय वडेट्टीवार यांच्या उपस्थितीत १२ जानेवारीला पुरस्कार वितरण
शनिवार, ०४ जानेवारी
संगमनेर – ज्येष्ठ स्वातंत्र्य सेनानी भाऊसाहेब थोरात व कृषी क्रांतीचे प्रणेते डॉ. अण्णासाहेब शिंदे स्मृती पुरस्काराची घोषणा शनिवारी करण्यात आली आहे. स्वातंत्र्य सेनानी भाऊसाहेब थोरात यांच्या नावाने दिला जाणारा स्मृती पुरस्कार यंदा ज्येष्ठ विचारवंत प्राध्यापक डॉ. रावसाहेब कसबे यांना देण्यात येणार आहे. तर अण्णासाहेब शिंदे यांच्या नावाने दिला जाणारा स्मृती पुरस्कार वसंतदादा शुगर इन्स्टिट्यूटला व सहकारातील आदर्श नेतृत्वाचा पुरस्कार राज्याचे माजी मंत्री राजेश टोपे यांना जाहीर करण्यात आला आहे.
यांनी केली घोषणा – नाशिक पदवीधर मतदारसंघाचे आमदार सत्यजित तांबे व युवक काँग्रेस अध्यक्ष कॅन्सर तज्ञ डॉ. जयश्री थोरात यांनी यंदाच्या या राज्यस्तरीय स्मृती पुरस्कारांची घोषणा केली.
वितरण कोठे आणि कधी – पुरस्कारांचे वितरण संगमनेरमध्ये प्रेरणा दिनी १२ जानेवारीला दुपारी साडेबारा वाजता थोरात यांच्या जनसंपर्क कार्यालयांमध्ये यशोधन मैदानावर करण्यात येणार आहे. कोल्हापूरचे खासदार श्रीमंत शाहू छत्रपती महाराज व आमदार विजय वडेट्टीवार यांच्या हस्ते तर राज्याचे माजी मंत्री बाळासाहेब थोरात यांच्या अध्यक्षतेखाली या पुरस्काराचे वितरण केले जाणार आहे.
यांची उपस्थिती – यावेळी निवड समितीचे प्रमुख माजी आमदार डॉ. सुधीर तांबे व महाराष्ट्र काँग्रेसचे कार्याध्यक्ष मुजफ्फर हुसेन यांच्यासह विविध मान्यवर उपस्थित राहणार आहे. प्रा. अशोक सोनवणे यांनी डॉ. अण्णासाहेब शिंदे यांच्या जीवन कार्यावर आधारित ‘कृषीरत्न’ पुस्तकाचे प्रकाशन होणार आहे.
अण्णासाहेब शिंदे पुरस्कार – कृषी, तंत्रज्ञान, शिक्षण, समाजसेवा आणि पर्यावरण क्षेत्रात उल्लेखनीय काम करणाऱ्यास डॉ. अण्णासाहेब शिंदे स्मृती पुरस्काराने गौरविण्यात येते. या पुरस्कारासाठी पुण्याच्या वसंतदादा शुगर इन्स्टिट्यूटची निवड करण्यात आली आहे.
भाऊसाहेब थोरात पुरस्कार – साहित्य, समाजसेवा, पर्यावरण, माध्यम आणि सहकार क्षेत्रात उल्लेखनीय कामगिरी करणाऱ्यास स्वातंत्र्य सैनिक भाऊसाहेब थोरात स्मृती पुरस्काराने गौरविले जाते. या पुरस्कारासाठी संगमनेरमधील साहित्यिक, प्राध्यापक डॉ. रावसाहेब कसबे यांची निवड करण्यात आली आहे.
सहकारातील आदर्श नेतृत्व पुरस्कार – याशिवाय सहकारात उत्कृष्ट काम करणाऱ्या नेतृत्वास सहकार महर्षी भाऊसाहेब थोरात सेवाभावी संस्थेच्या वतीने सहकारातील आदर्श नेतृत्व पुरस्कार दिला जातो. यंदा या पुरस्कारासाठी राज्याचे माजी मंत्री राजेश टोपे यांची निवड करण्यात आली आहे.
आवाहन – तरी प्रेरणा दिनानिमित्त होणाऱ्या या पुरस्कार वितरण सोहळ्यासाठी अहमदनगर जिल्ह्यातील व संगमनेर तालुक्यातील सर्व कार्यकर्ते, पदाधिकारी, नागरिक, महिला, युवक यांनी मोठ्या संख्येने उपस्थित राहावे असे आवाहन जयंती महोत्सव समिती व अमृत उद्योग समूहाच्यावतीने करण्यात आले आहे.
