संगमनेर – थोर स्वातंत्र्यसेनानी सहकार महर्षी भाऊसाहेब थोरात व हरीत क्रांतीचे प्रणेते डॉ. अण्णासाहेब शिंदे यांच्या जयंती महोत्सवानिमित्त रविवारी (१२जानेवारी) दुपारी साडेबारा वाजता होणाऱ्या पुरस्कार वितरण सोहळ्याची जय्यत तयारी यशोधन शेजारील मैदानावर सुरू असून या तयारीची माजी मंत्री बाळासाहेब थोरात यांनी पाहणी केली.
यशोधन जनसंपर्क कार्यालयाशेजारील मैदानावर प्रेरणा दिनानिमित्त होणाऱ्या जयंती महोत्सव कार्यक्रमाची तयारी सुरू आहे. सहकारमहर्षी भाऊसाहेब थोरात व डॉ. अण्णासाहेब शिंदे यांचा जयंती महोत्सव हा उत्तर महाराष्ट्रातील मोठा सांस्कृतिक महोत्सव असतो. यानिमित्त भव्य दिव्य पुरस्कार वितरण सोहळ्यासह दरवर्षी विविध सांस्कृतिक कार्यक्रमांचे आयोजन केले जाते.
यावर्षी रविवारी कोल्हापूरचे खासदार श्रीमंत शाहू महाराज व विरोधी पक्षनेते आमदार विजय वडेट्टीवार यांच्या उपस्थितीत व काँग्रेस नेते माजीमंत्री बाळासाहेब थोरात यांच्या अध्यक्षतेखाली आणि माजी आमदार डॉ. सुधीर तांबे व मुजफ्फर हुसेन यांच्या प्रमुख उपस्थितीमध्ये हा पुरस्कार वितरण सोहळा होणार आहे. 
या पुरस्कार वितरण सोहळ्यात हरितक्रांतीचे प्रणेते अण्णासाहेब शिंदे स्मृती पुरस्काराने पुण्याच्या वसंतदादा शुगर इन्स्टिट्यूटला, स्वातंत्र्य सेनानी भाऊसाहेब थोरात स्मृती पुरस्काराने ज्येष्ठ विचारवंत डॉ. रावसाहेब कसबे व सहकारातील आदर्श नेतृत्व पुरस्काराने माजी मंत्री राजेश टोपे यांना पुरस्काराने सन्मानित करण्यात येणार आहे.
कार्यक्रमासाठी यशोधन मैदानावर ६० बाय ६० फुटाचे भव्य स्टेज उभारण्यात आले असून भव्य मंडप, साउंड सिस्टिम, एलईडी व्यवस्था, पुरुष व महिलांसाठी स्वतंत्र बैठक व्यवस्था ,पत्रकार कक्ष, प्रशस्त पार्किंग यांसह अद्यावत सुविधा करण्यात आल्या आहेत.
याचबरोबर मागील सर्व जयंती महोत्सवातील निवडक फोटोंची गॅलरी या पुरस्कार सोहळ्याचे आकर्षण ठरणार आहे. आतापर्यंत राज्यातील अनेकांना या स्मृती पुरस्काराने गौरविण्यात आले आहे. राज्यात या पुरस्कार सोहळ्याने आपला वेगळा ठसा उमटविला असून अण्णासाहेब शिंदे, भाऊसाहेब थोरात स्मृती पुरस्कार मानाचे ठरले आहे.
जयंती महोत्सव व पुरस्कार वितरण समारंभासाठी अहमदनगर जिल्हा व संगमनेर तालुक्यातील सर्व नागरिक महिला युवक पदाधिकारी व कार्यकर्ते यांनी मोठ्या संख्येने उपस्थित राहावे, असे आवाहन आमदार सत्यजित तांबे, डॉ. जयश्री थोरात, अमृत उद्योग समूह व जयंती महोत्सव समितीच्यावतीने करण्यात आले आहे.
