संगमनेर – छत्रपती शिवाजी महाराज व शाहू महाराजांचा विचार घेऊन या परिसरामध्ये स्वातंत्र्य सैनिक भाऊसाहेब थोरात व डॉ. अण्णासाहेब शिंदे यांनी कार्य केले आहे. सहकार व शेती क्षेत्रातील त्यांनी केलेले कार्य हे महाराष्ट्राच्या ग्रामीण विकासात मोठे योगदान देणारे असल्याचे गौरवोद्गार कोल्हापूरचे खासदार श्रीमंत शाहू महाराज यांनी काढले आहे.
यशोधन जवळील मैदानात सहकार महर्षी भाऊसाहेब थोरात हरितक्रांतीचे प्रणेते डॉ. अण्णासाहेब शिंदे यांच्या जयंती महोत्सवात आयोजित पुरस्कार वितरण सोहळ्यात ते बोलत होते. अध्यक्षस्थानी माजी मंत्री बाळासाहेब थोरात हे होते. तर व्यासपीठावर माजी विरोधी पक्षनेते आमदार विजय वडेट्टीवार, खासदार भाऊसाहेब वाकचौरे, आमदार सत्यजित तांबे, आमदार हेमंत ओगले, माजी आमदार मोहन जोशी, ज्येष्ठ पत्रकार मधुकर भावे, कांचनताई थोरात, दुर्गाताई तांबे, रणजीतसिंह देशमुख, डॉ. जयश्री थोरात, प्रभावती घोगरे, दशरथ सावंत, मधुकरराव नवले, राजवर्धन थोरात आदी उपस्थित होते.
खा. शाहू महाराज म्हणाले, भाऊसाहेब थोरात आणि डॉ. आण्णासाहेब शिंदे यांचा वारसा बाळासाहेब थोरात यांनी समर्थपणे जपला आहे. भाऊसाहेबांनी सहकारातून तालुका समृद्ध केला तर अण्णासाहेबांनी देशात हरितक्रांती आणली. हे चांगले दिवस त्यांच्यामुळे आहे. बाळासाहेब थोरात यांच्या नेतृत्वाखालील संगमनेरचा सहकार पाहून आनंद झाला.
राज्यात सध्या अस्थिर परिस्थिती आहे. परंतु पुन्हा एकदा महाराष्ट्र घडवण्यासाठी बाळासाहेबांच्या नेतृत्वाची राज्याला गरज आहे. अपघात झाला असेल परंतु त्यातून सावरून कार्यकर्त्यांनी तालुका सांभाळावा. कारण बाळासाहेबांसारखे नेतृत्व हे सध्याच्या राजकारणात दुर्मिळ आहे. चांगल्या विचारांचा वारसा जोपासणाऱ्या या नेतृत्वाला ताकद द्या असे ते म्हणाले.
कार्यक्रमाचे प्रास्ताविक माजी आमदार डॉ. सुधीर तांबे यांनी केले. सूत्रसंचालन नामदेव कहांडळ यांनी केले. यावेळी संगमनेर तालुक्यातील कार्यकर्ते नागरिक पदाधिकारी महिला युवक मोठ्या संख्येने उपस्थित होते.
यांचा झाला पुरस्काराने गौरव…
अमृतवाहिनी शेती व शिक्षण विकास संस्थेच्यावतीने कृषी, तंत्रज्ञान, शिक्षण, समाजसेवा व पर्यावरण क्षेत्रातील उल्लेखनीय कार्याबद्दल डॉ. अण्णासाहेब शिंदे स्मृती पुरस्कार वसंतदादा शुगर इन्स्टिट्यूट (पुणे) यांना तर सहकार, साहित्य, समाजसेवा, पर्यावरण, क्षेत्रातील स्वातंत्र्य सैनिक भाऊसाहेब थोरात स्मृती पुरस्कार ज्येष्ठ विचारवंत डॉ रावसाहेब कसबे यांना देण्यात आला. यावेळी सहकार महर्षी भाऊसाहेब थोरात सेवाभावी संस्थेच्या वतीने सहकारातील नेतृत्व पुरस्कार माजी आरोग्य मंत्री राजेश टोपे यांना देण्यात आला. एक लाख रुपये रोख, सन्मानचिन्ह असे या पुरस्काराचे स्वरूप आहे.
