मुंबई – उपमुख्यमंत्री एकनाथ शिंदे यांच्या शिवसेना नेत्यांच्या बैठकीमध्ये माजी मुख्यमंत्री उद्धव ठाकरे यांना बाळासाहेब ठाकरे स्मारकाच्या अध्यक्षपदावरून हटविण्याचा प्रस्ताव मंजूर करण्यात आला आहे. हा प्रस्ताव मुख्यमंत्री देवेंद्र फडणवीस यांच्याकडे मंजुरीसाठी पाठविला जाणार असल्याची माहिती शिवसेना शिंदे गटाचे ज्येष्ठ नेते रामदास कदम यांनी दिले आहे.
शिवसेनाप्रमुख बाळासाहेब ठाकरे यांच्या जयंतीच्या औचीत्यावर शिवसेनेचा मेळावा आयोजित केला जाणार आहे. शिवसेनेचे खासदार आणि आमदार या मेळाव्याला उपस्थित राहतील, असं कदम यांनी म्हटलं आहे.
शिंदे गटाच्या या मागणीमुळे पुन्हा एकदा शिंदे व ठाकरे गटामधील वाद उफाळून येण्याची चिन्ह निर्माण झाली आहे. दरम्यान मुख्यमंत्री देवेंद्र फडणवीस यांचे निकटवर्ती असलेले आमदार प्रसाद लाड यांनी नोव्हेंबर २०२२ मध्ये स्मारक राज्य सरकारने ताब्यात घेण्याची मागणी केली होती. यावरून मोठा वाद उद्भवला होता.
कदम म्हणाले, “बाळासाहेब ठाकरे यांच्या स्मारकाच्या अध्यक्षपदी राहण्याचा माजी मुख्यमंत्री उद्धव ठाकरे यांना कोणताही अधिकार नाही. त्यांची हकालपट्टी केली पाहिजे. ठाकरे यांना मला विचारायचं आहे की आता तुमचा स्वाभिमान कुठे गेला आहे? तुम्ही देशाचे पंतप्रधान नरेंद्र मोदी यांच्या बद्दल बोललात, गृहमंत्री अमित शहा यांच्यावर टीका केलीत, मुख्यमंत्री देवेंद्र फडणवीस, उपमुख्यमंत्री एकनाथ शिंदे यांच्यावर टीका केली. आता तुम्ही देवेंद्र फडणवीस यांना भेटत आहात. तुम्ही तुमचा स्वाभिमान गाणं ठवला आहे का? फडणवीस यांना भेटताना तुम्हाला लाज वाटत नाही का असा सवाल देखील त्यांनी उपस्थित केला.
ठाकरे शिवसेनाप्रमुखांच्या स्मारकाचे अध्यक्ष कसे होऊ शकतात? मी मुख्यमंत्री देवेंद्र फडणवीस आणि शासनाला विनंती करणार आहे की, कोणत्याही परिस्थितीत हिंदू हृदय सम्राट दिवंगत बाळासाहेब ठाकरे यांच्या स्मारकाच्या अध्यक्षपदावरून उद्धव ठाकरे यांची हकालपट्टी झाली पाहिजे. स्मारकाचा आणि त्यांचा संबंध राहता कामा नये. याची जबाबदारी शासनाने घेतली पाहिजे. उद्धव ठाकरे स्मारकात गेले तर बाळासाहेब ठाकरे याना दुःख होईल, त्यांच्या मनाला वेदना होतील. ज्यांनी माझे विचार पायदळी तुडविले तो माझा मुलगा माझ्या स्मारकात कसा येऊ शकतो असा विचार ते करतील असे देखील कदम म्हणाले.
