संगमनेर – राज्यभरात अत्यंत प्रतिष्ठेच्या असलेल्या सहकारमहर्षी T- 20 क्रिकेट स्पर्धेच्या पारितोषिक वितरण व अंतिम सामन्यासाठी शुक्रवारी (१७ जानेवारी) दुपारी चार वाजता भारताचा माजी कसोटी कर्णधार तथा संगमनेर तालुक्याचा सुपुत्र अजिंक्य रहाणे उपस्थित राहणार आहे. याशिवाय माजी मंत्री बाळासाहेब थोरात, माजी आमदार डॉ. सुधीर तांबे हे देखील उपस्थित राहणार असल्याची माहिती स्पर्धेचे संयोजक आमदार सत्यजित तांबे यांनी दिली आहे.
जयहिंद लोकचळवळ व क्रिकेट असोसिएशन ऑफ संगमनेर यांच्या संयुक्त विद्यमाने सहकार महर्षी भाऊसाहेब थोरात क्रीडा संकुल येथे एक जानेवारीपासून राज्यस्तरीय टी ट्वेंटी क्रिकेट स्पर्धा सुरू आहे. स्पर्धेचे हे २५ वे वर्ष असून यामध्ये ३२ संघांचा सहभाग आहे. यावर्षी या स्पर्धेत रणजी व आयपीएलमधील काही खेळाडूंनी सहभाग नोंदवला.
सतरा दिवस चाललेल्या या स्पर्धेत षटकार, चौकारांच्या आतिषबाजीने स्टेडियम दनानुन गेले. राष्ट्रीय दर्जाचे आयोजन, खेळाडूंना रंगबिरंगी कपडे, संपूर्ण मैदानावर हिरवळ, प्रेक्षकांसाठी चांगली बैठकव्यवस्था, पार्किंग , ऑनलाईन प्रक्षेपण या सर्व आधुनिक सुविधामुळे या स्पर्धेला दररोज दहा हजार प्रेक्षकांची उपस्थिती लाभत आहे.
शुक्रवारी माजी आमदार डॉ. सुधीर तांबे यांचा वाढदिवसही स्टेडियममध्ये होणार असून या २५ व्या स्पर्धेचा पारितोषिक वितरण व अंतिम सामना होणार आहे.
यावेळी भारताचा माजी कसोटी कर्णधार तथा संगमनेर तालुक्याचा सुपुत्र अजिंक्य रहाणे पूर्ण वेळ उपस्थित राहणार आहे. तसेच राज्याचे माजी मंत्री बाळासाहेब थोरात, जयहिंद लोक चळवळीचे संस्थापक माजी आमदार डॉ. सुधीर तांबे, माजी नगराध्यक्ष दुर्गाताई तांबे, कॅन्सरतज्ञ डॉ. जयश्रीताई थोरात, उद्योजक गिरीश मालपाणी यांच्यासह विविध मान्यवर उपस्थित राहणार आहेत.
अंतिम सामन्यासाठी संगमनेरमधील तमाम क्रीडा प्रेमींनी मोठ्या संख्येने उपस्थित राहावे, असे आवाहन आ. सत्यजित तांबे, जय हिंद लोक चळवळ व क्रिकेट असोसिएशन ऑफ संगमनेर यांनी केले आहे.
