कत्तल होण्यापूर्वीच पोलिसांनी दिले १२ गायी आणि २ वासरांना जीवदान!

संगमनेर – १२ गायी आणि २ वासरांची संगमनेरच्या बेकायदेशीर कत्तलखान्यात कत्तल होण्यापूर्वीच पोलीस उपअधीक्षकांच्या पथकाने गुरुवारी संध्याकाळी या गोवंश जनावरांना जीवदान दिले आहे. संगमनेर शहरातील मदिना नगर येथे पोलिसांनी टाकलेल्या छाप्यात हा प्रकार समोर आला.
संगमनेरचे पोलीस उपअधीक्षक कुणाल सोनवणे यांना मदिनानगरमधील एका काटवणामध्ये कत्तलीसाठी जिवंत गोवंश जनावरे बांधून ठेवले असल्याची माहिती मिळाली होती. सोनवणे यांनी यासंदर्भात आपल्या पथकातील अधिकारी कर्मचाऱ्यांना माहिती देत कारवाई करण्याचे आदेश दिले होते.
पोलीस उपाधीक्षकांना मिळालेल्या माहितीच्या आधारे सहाय्यक पोलीस निरीक्षक कल्पेश दाभाडे, पोलीस कॉन्स्टेबल राहुल सारबंदे व पोलीस नाईक राहुल डोके यांचे घटनास्थळी जात मिळालेल्या माहितीच्या आधारे मदिनानगरमध्ये जात पाहणी केली असता पथकाला चौदा जिवंत व गोवंश जनावरे निर्दयतेने कत्तलीच्या उद्देशाने या जनावरांना चारा पाणी न देता बांधून ठेवले असल्याचे दिसून आले. यामध्ये १२ गायी आणि २ वासरांचा समावेश होता.
पोलीस पथकाने या जनावरांची तिथून सुटका करत जनावरे ताब्यात घेतली. या जनावरांची किंमत १.९४ हजार एवढी असल्याचे तक्रारीत म्हटले आहे. या संदर्भात पोलीस नाईक राहुल डोके यांच्या फिर्यादीवरून संगमनेर शहर पोलीस ठाण्यात पोलिसांनी अज्ञात आरोपी विरोधात गुन्हा दाखल करण्यात आला आहे. कारवाईदरम्यान पकडलेल्या जिवंत गोवंश जनावरांना सायखिंडी येथील जीवदया गोशाळेत दाखल करण्यात आले आहे.